عبادالحق بی بی سی اردو ڈاٹ کام، لاہور

	گورنر پنجاب سلمان تاثیر نے گزشتہ ماہ صوبائی حکومت کی سمری کی منظوری دی تھی

بدھ کی رات حکومت پنجاب کی جانب سے جاری ہونے والے نوٹیفکیشن کے تحت پنجاب کے نو ڈویژنل کمشنر کا تقرر کر دیا گیا ہے جو جمعرات سے اپنی ذمہ داریاں سنبھالیں گے۔

اس نوٹیفکیشن کے تحت خسرو پرویز خان لاہور کے کمشنر ہونگے۔

خسرور پرویز خان اپنی نئی تقرری سے پہلے سیکرٹری سیاحت کے عہدے پر کام کر رہے تھے اور سابق حکومت میں پنجاب کے سابق ہوم سیکرٹری پنجاب بھی رہے ہیں۔

حکومت پنجاب نے حال میں ہی ساہیوال کو بھی ڈویژن کا درجہ دیا ہے اور اس نئے ڈویژن میں طارق محمود خان کو کمشنر مقرر کیا گیا ہے۔

پنجاب کے دیگر ڈویژنز میں حسیب اطہر کو راولپنڈی، خالد مسعود چودھری کو گوجرانوالہ، اعجاز علی ضیغم کوسرگودھا، محمد علی گردیزی کو ملتان ، مشتاق احمد کو بہاولپور، حسن اقبال کو ڈیرہ غازی خان اور زاہد سعید کو فیصل آباد کا کمشنر مقرر کیا گیا ہے۔

خیال رہے کہ گورنر پنجاب سلمان تاثیر نے گزشتہ ماہ صوبائی حکومت کی اس سمری کی منظوری دی تھی جو صوبے میں ڈویژنل کمشنر کے نظام کو دوبارہ رائج کرنے کے لیے گورنر کو بھجوائی گئی تھی۔

ڈویژنل کمشنر کا نظام سابق صدر جنرل ریٹائرڈ پرویز مشرف کے دور حکومت میں اس وقت ختم کردیاگیا تھا جب سنہ دو ہزار ایک میں نیا بلدیاتی نظام متعارف کرایا گیا تھا۔

ڈویژنل کمشنر کا نظام لینڈ ریونیو ایکٹ کے ذریعے بحال کیا جا رہا ہے ۔

مبصرین کا خیال ہے کہ اس نظام کی بحالی کے بعد صوبائی حکومت ضلع ناظمین کے بجائے ڈویژنل کمشنرز کےذریعے براہ راست ڈسٹرکٹ کوآرڈینیشن آفیسر سے اپنے احکامات پر عمل درآمد کرائے گی۔