علی سلمان بی بی سی اردو ڈاٹ کام، لاہور

	حکمران مسلم لیگ کے کچھ لوگ اس حکمت عملی سے ناراض ہیں اور کھل کر مخالفت بھی کرنے لگے ہیں

غیر حتمی اور غیر سرکاری نتائج کے مطابق لاہور سے میاں عامر محمود دوسری بارضلعی ناظم کامیاب ہوئے ہیں۔

چکوال سے سردار غلام عباس ضلعی ناظم کے طورپر کامیاب ہوئے ہیں۔ چکوال سے ہارنے والے امیدوار ریٹائرڈ لفیٹنٹ جنرل مجید ملک بھی اگرچہ حکمران مسلم لیگ کے نائب سنئر نائب صدر ہیں لیکن ان کی وزیر اعلیٰ پنجاب نے مخالفت کی تھی۔

گجرات سے حکمران مسلم لیگ کے صدر چودھری شجاعت حسین کے بھائی چودھری شفاعت حسین دوسری بار ضلعی ناظم منتخب ہوئے ہیں۔

اٹک سے بھی وزیر اعلیٰ کے رشتہ دار طاہر صادق بطور ضلع ناظم کامیاب ہوئے۔

بھکر سے حمید اکبر نوانی کامیاب ہوئے ہیں۔ وزیر اعلیٰ پنجاب نے انہیں کامیاب کرانے کے لیے جو طریقہ کار اختیار کیا تھا اس پر احتجاج کرتے ہوۓ صوبائی کابینہ کے ایک رکن نعیم اللہ شاہانی نے استعفی دیدیاتھا۔

خانیوال سے سردار احمد یار ہراج سابق سپیکر قومی اسمبلی فخر امام کے بھائی کو ہرا کامیاب قرار پائے ہیں۔

راولپنڈی سے راجہ جاوید اخلاص سابق ضلعی ناظم راجہ طارق کیانی کو ہرا کر کامیاب ہوئے ہیں۔

کامیاب ہوئے ہیں۔ کو وزیراعلیٰ کی حمائت حاصل تھی اور انہوں نے کو شکست دی۔

راجہ طارق کیانی کے قریبی حلقوں کا پھلایا یہ تاثر بھی ان کے کام نہیں آیا کہ انہیں وزیر اعلی پنجاب کے سواحکمرانوں کی درپردہ حمائت حاصل ہے۔
ملتان سے میاں فیصل مختار کامیاب ہوۓہیں بہاولپور سے طارق بشیر چیمہ،ساہیوال سے راۓ حسن نواز ،راجن پور سے علی رضا دریشک،جہلم سے فرخ الطاف کامیاب ہوۓ ہیں ان تمام کا تعلق چودھری پرویز الہی کے حمائت یافتہ افراد میں سے بتایا جاتا ہے۔

ضلعی نظامت کے لیے صرف فیصل آباد سے اپوزیشن کے اتحاد یعنی اے آر ڈی کے امیدوار رانا زاہد توصیف برتری لیے ہوۓ نظر آتے ہیں اس کے علاوہ مظفر گڑھ سے پیپلز پارٹی کے سردار قیوم خان کو ووٹوں کی برتری حاصل ہے۔
پنجاب کے مختلف تحصیل اور ٹاؤن ناظمین کے جو نتائج سامنے آرہے ہیں ان میں بھی پنجاب کے وزیر اعلی کے حمائت یافتہ امیدوار سبقت لیے ہوۓہیں مثال کے طور پر لاہور کے نو ٹاؤن میں سے صرف ایک پر اپوزیشن کے امیداور ناظم بن سکے ہیں اسی طرح فیصل آباد میں جہاں ضلعی ناظم کے لیے اپوزیشن کے رانازاہد توصیف برتری لیے ہوۓ ہیں وہاں سے بھی آٹھ میں سے چھ پر حکمران مسلم لیگ کے ٹاؤن ناظم آگئے ہیں۔

سیاسی تجزیہ نگاروں کا کہنا ہے کہ پنجاب کے چودھریوں نے ان انتخابات کے لیے پنجاب کی حد تک اپنی من مانی کی اور پارٹی کے دیگر حلقوں کو نظر انداز کرکے صرف انہی ٹاؤن تحصیل اور ضلعی ناظمین کے امیدواروں کی حمائت کرکے انہیں جتوانے کی کوشش کی جن پر انہیں ذاتی طور پر اعتماد تھا۔

ان کی پارٹی کی حد تک متنازعہ اس حکمت عملی کی وجہ سے صدر جنرل پرویز مشرف کو بھی پارٹی معاملات میں مداخلت کرنا پڑی تھی لیکن ضلعی ناظمین کے حوالے سے جو نتائج سامنے آۓ ہیں سیاسی تجزیہ نگاروں کا کہنا ہے کہ پنجاب کے چودھری اپنی حکمت عملی میں کامیاب نظر آتے ہیں اگرچہ حکمران مسلم لیگ کے باقی دھڑے ان کی اس حکمت عملی سے ناراض ہوئے ہیں اور کھل کر چودھریوں کے مخالفت بھی کرنے لگے ہیں۔