علی سلمان بی بی سی اردو ڈاٹ کام، لاہور

پولنگ مکمل ہونے کے دو روز بعد تک مجموعی طور انتخابی رنجش میں دو درجن کے قریب افراد ہلاک ہوچکے ہیں

بلدیاتی انتخابات کے پہلے مرحلے کی پولنگ مکمل ہونے کے دو روز بعد تک مجموعی طور انتخابی رنجش میں دو درجن کے قریب افراد ہلاک ہوچکے ہیں۔ جب کہ دوسرے اور آخری مرحلےکی پولنگ پچیس اگست کو ہوگی۔

فیصل آباد میں مسلم لیگ نواز کے حمایت یافتہ امیدوار خواجہ منا کے انتخابی دفتر پر موٹرسائیکل سواروں کی فائرنگ سے ان کے تین کارکن ہلاک اور ایک زخمی ہو گیا۔

فیصل آباد کے ڈپٹی انسپکٹر جنرل پولیس چودھری سجاد نے بی بی سی کو بتایاکہ پولیس نے نو افراد کو حراست میں لے لیاہے۔

فیصل آباد کا شمار ان علاقوں میں ہوتا جہاں ابھی پچیس اگست کو پولنگ ہونا ہے۔

ادھر کل رات گوجرانوالہ میں جیت کی خوشی میں نکالے جانے والے ایک جلوس پر فائرنگ اور پھر فائرنگ کا نشانہ بننے والے گروپ کی جانب سے جوابی حملے میں فریقن کا ایک ایک حامی ہلاک ہوگیا۔

مجلس عمل پنجاب کے صدر لیاقت بلوچ نے حکومت کی مبینہ دھاندلی کے خلاف آج ایک پریس کانفرنس کے دوران حکمران سیاسی جماعت کو پرتشدد واقعات کے لیے موردالزام ٹھہرایا۔ ان کے ہمراہ جماعت اسلامی کے رکن قومی اسمبلی فرید پراچہ بھی موجود تھے۔

ان کا کہنا تھا کہ ’ملک کے تریپن اضلاع میں جمعرات کو پولنگ ہوئی تھی اور صرف پولنگ والے دن کے پرتشدد واقعات میں کم از کم دس افراد ہلاک ہوئے تھے۔ دوسرے مرحلے کی پولنگ میں پچیس اگست کو ہوگی، جس کے لیے انتخابی مہم میں تیزی آتی جارہی ہے۔