عدنان عادل بی بی سی اردو ڈاٹ کام، لاہور

قانون میں ترمیم کے بعد ایک یونین کونسل میں تیرہ نشستیں رہ گئی ہیں

گزشتہ مقامی الیکشن میں فی نشست اوسطاً ڈھائی امیدواروں نے کاغذات جمع کرائے تھے اور اس بار یہ تعداد ساڑھے تین ہے۔

ابھی الیکشن کمیشن امیدواروں کی جانچ پڑتال کے بعد کاغدات نامزدگی مسترد بھی کرسکتا ہے اور امیدوار خود سے بھی کاغذات واپس لے سکتے ہیں۔ تاہم دونوں انتخابات میں کاغذات نامزادگی داخل کرانے والوں کا تقابل کچھ یوں ہے۔

پنجاب کے سترہ ضلعوں میں اٹھارہ اگست کو سولہ ہزار چون یونین کونسلوں کی اکیس ہزار پانچ سو دو نشستوں کے لیے ہونے والے انتخابات کے لیے ستتر ہزار تین سو اڑتیس امیدواروں نے اپنے کاغذات نامزدگی داخل کرائے ہیں۔ یوں اوسطاً ایک نشست کے لیے ساڑھے تین امیدوار سامنے آئے ہیں۔

اس کے برعکس اکتیس دسمبر سنہ دو ہزار کو پنجاب کے آٹھ ضلعوں میں یونین کونسلوں کی پانچ سو پچاس نشستوں کے انتخابات کے لیے پر گیارہ ہزار پانچ سو پچاس افراد نے کاغذات داخل کرائے تھے اور یوں اوسطاً ایک نشست کے لیے ڈھائی امیدوار میدان میں آئے تھے۔

الیکشن کمیشن پنجاب سے بی بی سی کو ملنے والے اعداد و شمار کے مطابق سترہ ضلعوں میں مردوں کی چار عمومی نشستوں پر چھتیس ہزار پانچ سو سترہ افراد نے کاغذات داخل کرائے ہیں، عورتوں کی دو دو مخصوص نشستوں کے لیے اٹھ ہزار نو سو اٹھاسی، مزدوروں اور کسانوں کی دو دو مخصوص نشستوں کے لیے سولہ ہزار نو سو پچیس، مزدور کسان عورتوں کی دو مخصوص نشستوں کے لیے چھ ہزار نو سو ترانوے، ناظم اور نائب ناظم کے پینل کے کے لیے پانچ ہزار سات سو چھبیس پینل امیدواروں اور اقلیت کی ایک مخصوص نشست کے لیے کل دو ہزار چار سو نواسی لوگوں نے کاغذات جمع کرائے ہیں۔

گزشتہ مقامی انتخابات (سنہ دو ہزار اور دو ہزار ایک) میں ایک یونین کونسل کی اکیس نشستوں پر مشتمل تھی۔ اب قانون میں ترمیم کے بعد ایک یونین کونسل میں تیرہ نشستیں رہ گئی ہیں۔

کاغذات جمع کرانے والے افراد کی تعداد میں گزشتہ انتخابات کی نسبت نمایاں اضافہ سے ان انتخابات میں لوگوں کی زیادہ شرکت کا اشارہ ملتا ہے۔ اس بار تمام سیاسی جماعتیں مقامی انتخابات میں مختلف گروپوں کے ناموں سے حصہ لے رہی ہیں گو یہ انتخابات غیرجماعتی بنیادوں پر کرائے جارہے ہیں۔