عبدالحئی کاکڑ بی بی سی اردوڈاٹ کام، پشاور

	صوبہ سرحد اور بلوچستان میں یومِ عاشور کے موقع پر ماضی کے مقابلے میں سخت حفاظتی انتظامات کیے جاتے ہیں

ماضی میں تشدد کے ہولناک تجربوں سے گزرے شہری اس بار اتنے خوفزدہ ہوچکے ہیں کہ صوبہ سرحد کے حساس علاقوں پشاور، ہنگو اور ڈیرہ اسماعیل خان کے شہری یومِ عاشور کے موقع پر گھروں میں رہنے کو ترجیح دے رہے ہیں۔
صوبہ سرحد کے ضلع ہنگو میں تو عام شہریوں کے خوف کا اندازہ اس بات سے لگایا جاسکتا ہے کہ ساٹھ فیصد لوگ شہر سے نقل مکانی کرچکے ہیں جبکہ دو ہزار چھ کے فسادات میں تقریباً چھ سو دکانوں کے نذرِ آتش ہونے کے بعد اس بار دکانداروں نے اپنا سامان محفوظ جگہوں پر منتقل کردیا ہے۔

دو ہزار تین سے پہلے محرم الحرام کے موقع پر لوگوں میں اتنا خوف دکھائی نہیں دیتا تھا مگر ماتمی جلوسوں اور امام بارگاہوں پر کئی سال تک تسلسل کے ساتھ ہونے والے مختلف نوعیت کے حملوں نے صورتحال کو یکسر بدل دیا ہے۔

اگر دیکھا جائے تو دو مارچ دوہزار تین کو صوبہ بلوچستان کے دارالحکومت کوئٹہ میں واقع امام بارگاہ پر محرم الحرام کے دوران ہونے والے خودکش حملے کے بعد ہر سال امام بارگاہوں اور ماتمی جلوسوں کو نشانہ بنایا گیا ہے۔ کوئٹہ میں ہونے والے اس حملے میں پچاس کے قریب لوگ مارے گئے تھے جو ملک میں کئی دہائیوں سے جاری فرقہ ورانہ فسادات میں خودکش حملے کے استعمال کا شاید پہلا واقعہ تھا۔

دو ہزار تین سے دو ہزار آٹھ تک محرم الحرام کے دوران صوبہ سرحد اور بلوچستان میں اس نوعیت کی آٹھ وارداتیں ہوچکی ہیں جن میں ایک اندازے کے مطابق مجموعی طور پر ایک سو پچھتر افراد ہلاک جبکہ دو سو کے قریب زخمی ہوئے ہیں۔

صوبہ بلوچستان کے دارالحکومت کوئٹہ میں دو مارچ دو ہزار تین اور جولائی دو ہزار چار کو لیاقت بازار میں ماتمی جلوس اور امام بارگاہ پر فائرنگ اور مبینہ خودکش حملوں میں بالترتیب پچاس اور بیالیس افراد ہلاک ہوئے تھے۔ کوئٹہ ہی میں دو ہزار پانچ کو پولیس نے دومبینہ خودکش بمباروں کو گولی مار کر ہلاک کردیا تھا جو پولیس کے دعوے کے مطابق خودکش جیکٹ پہن کر ماتمی جلوس پر حملہ کرنا چاہتے تھے۔

اس کے اگلے سال یعنی دو ہزار سات کے دوران اس قسم کے حملوں کا دائرہ وسیع ہوکر ڈیرہ اسماعیل خان اور صوبائی دارالحکومت پشاور تک پھیل گیا۔اس سال محرم الحرام کے دوران ہنگو، ڈیرہ اسماعیل او پشاور میں تین مختلف واقعات پیش آئے جن میں مجموعی طور پر سترہ افراد ہلاک جبکہ قریباً چالیس زخمی ہوگئے تھے۔

ان میں ستائیس جنوری کو پشاور کے تاریخی بازار قصہ خوانی میں واقع ڈھکی دلگراں میں ہونے والا مبینہ خودکش حملہ اس لیے قابل ذکر ہے کہ اس نے صوبہ سرحد سے ایک ایسا پولیس افسر ملک سعد کوچھین لیا جنکی شہریوں میں عزت اور احترام کا اندازہ اس بات سے لگایا جاسکتا ہے کہ اس واقعے کی برسی کے موقع پر ہر سال پشاور کی سڑکوں پر ان کی ایک بڑی تصویر آویزاں کی جاتی ہے۔

دو ہزار آٹھ میں محرم الحرام کے موقع پر صوبہ سرحد میں دو مختلف واقعات رونما ہوئے تھے جن میں سے ایک جنوبی ضلع ہنگو میں پیش آیا جہاں پر بیس جنوری کو یومِ عاشور کے موقع پر کرفیو کے نفاذ کے باوجود ماتمی جلوس پرفائرنگ ہوئی تھی اور تین اہلکاروں سمیت بارہ افراد زخمی ہوگئے تھے۔

سترہ جنوری دو ہزار آٹھ ہی کو صوبائی دارالحکومت پشاور میں واقع مرزا قاسم بیگ امام بارگاہ پر مجلس کے دوران مبینہ خودکش حملہ ہوا جس میں دس افراد ہلاک اور بیس زخمی ہوگئے تھے۔