انتخاب امیر بی بی سی اردو ڈاٹ کام ، پشاور

	حکومت کو امن عامہ کی صورتحال پر تشویش ہے

نگراں صوبائی وزیرِ اطلاعات امتیاز حُسین گیلانی نے جمعرات کو پشاور میں ایک پریس کانفرنس کے دوران کہا کہ حکومت نے ماضی کے واقعات اور عوام میں پائے جانے والے خدشات کے پیشِ نظر صوبہ بھر کے تمام اضلاع کو تین درجوں میں تقسیم کرکے محرم کے دوران امن برقرار رکھنے کے لیے حکمتِ عملی مرتب کی ہے ۔

اُنہوں نے کہا کہ انتہائی حساس قرار دیے جانے والے اضلاع میں پشاور ، ہنگو ، کوہاٹ اور ڈیرہ اسماعیل خان شامل ہیں جبکہ دوسرے درجے کے انتہائی حساس اضلاع میں ہری پور ، ٹانک اور مانسہرہ شامل ہیں ۔ دیگر تمام ضلعوں میں صورتِحال تسلی بخش ہے ۔

سندھ ، پنجاب اور بلوچستان سے تعلق رکھنے والے ایسے مقررین اور علماء کے صوبہ سرحد میں داخلے پر پابندی عائد کی گئی ہے جو اشتعال انگیز تقریریں کرنے کی وجہ سے مشہور ہیں ۔ اسی طرح صوبہ سرحد سے تعلق رکھنے والے بعض عناصر کی بین الصوبائی حرکت پر پابندی لگائی گئی ہے حکومت صوبہ سرحد

حالات خراب ہونے پر کسی بھی علاقے میں فوج ، فرنٹیئر کور اور فرنٹیئر کانسٹیبلری کے دستے تعینات کیے جا سکتے ہیں ۔

انہوں نے کہا کہ حکومت نے شیعہ اور سُنی مسلک سے تعلق رکھنے والے اثر و رسوخ کے حامل علماء سے رابطے کیے ہیں تاکہ امن قائم رکھنے میں ان کے فعال کردار کو یقینی بنایا جائے ۔

’ سندھ ، پنجاب اور بلوچستان سے تعلق رکھنے والے ایسے مقررین اور علماء کے صوبہ سرحد میں داخلے پر پابندی عائد کی گئی ہے جو اشتعال انگیز تقریریں کرنے کی وجہ سے مشہور ہیں ۔ اسی طرح صوبہ سرحد سے تعلق رکھنے والے بعض عناصر کی بین الصوبائی حرکت پر پابندی لگائی گئی ہے ‘۔

انہوں نے بتایا کہ امن قائم رکھنے کےلیے واپڈا سے گزارش کی گئی ہے کہ صوبہ سرحد میں کم از کم محرم کے پہلے دس روز بجلی کی لوڈ شیڈنگ نہ کی جائے ۔

پریس کانفرنس کے بعد صحافیوں سے بات کرتے ہوئے صوبہ سرحد کے انسپیکٹر جنرل پولیس شریف ورک نے کہا ہے کہ ’ گو کہ اطلاعات نہیں لیکن پھر بھی خودکش حملوں کا خدشہ محرم میں موجود ہے ‘ ۔

گزشتہ سال محرم کے پہلے عشرے میں پشاور شہر میں ہونے والے خودکش حملے میں دس سے زائد افراد ہلاک ہوئے تھے جن میں امن کمیٹیوں کے ارکان سمیت پشاور پولیس کے اعلیٰ افسران بھی شامل تھے ۔