اطلاعات کے مطابق ذکی لکھوی کو بھارت کے حوالے کرنے کے لیے پاکستان کو امریکی دباؤ کا سامنا ہے

جریدے میں پاکستانی سکیورٹی ذرائع کے حوالے سے شائع ہونے والی ایک خبر میں کہا گیا ہے کہ دسمبر کے اوائل میں پاکستان کے زیرِ انتظام کشمیر میں لشکرِ طیبہ سے تعلق رکھنے والے جن رہنماؤں کوگرفتار کیا گیا تھا ان میں سے ایک اہم رہنما ضرار شاہ نے دورانِ تفتیش ممبئی حملوں میں اپنی تنظیم کے کردار کا اعتراف کر لیا ہے۔

وال سٹریٹ جرنل کے مطابق سکیورٹی ذرائع نے بتایا ہے کہ ضرار شاہ کے
اعتراف کے علاوہ امریکی اداروں کے پاس ایک ایسی ٹیلیفونک گفتگو بھی ریکارڈ ہے جس میں ضرار شاہ اور تاج محل ہوٹل پر حملہ کرنے والوں میں شامل ایک شخص کی باتیں شامل ہیں۔

وال سٹریٹ جرنل کے علاوہ جنوبی ایشیا میں کچھ اخبارات میں ایسی خبریں بھی شائع ہوئی ہیں کہ ممبئی حملوں کے مبینہ سرغنہ ذکی الرحمٰن لکھوی کو بھارت کے حوالے کرنے کے لیے پاکستان کو امریکی دباؤ کا سامنا ہے۔

اس سلسلے میں جب بی بی سی اردو کے نامہ نگار اعجاز مہر نے صدرِ پاکستان کے ترجمان فرحت اللہ بابر سے رابطہ کیا تو انہوں نے ذرائع ابلاغ میں چھپنے والی خبروں کی تردید کرتے ہوئے کہا کہ لشکرِ طیبہ کے گرفتار شدہ رہنماؤں کو بھارت کے حوالے کرنے کے لیے امریکہ کا پاکستان پر کوئی دباؤ نہیں ہے۔

	ممبئی حملوں میں دو سو سے کچھ کم افراد ہلاک ہوئے تھے

صدر کے ترجمان نے کہا کہ بھارت کے ساتھ پاکستان کا ملزمان کے تبادلے کا کوئی معاہدہ موجود نہیں اور اگر بھارت نے کسی پاکستانی کے ممبئی حملوں میں ملوث ہونے کے ٹھوس ثبوت پیش کیے تو ان کے خلاف پاکستانی قوانین کے تحت ملک کے اندر کارروائی ہوگی۔ انہوں نے مزید کہا کہ’اس بار کسی کے خلاف بھی پکے ثبوت ملنے کی صورت میں کارروائی ایسی ہوگی جو پوری دنیا کو نظر آئے گی‘۔

ادھر بھارت کے وزیرِ مملکت برائے امورِ خارجہ آنند شرما نے کہا ہے کہ ’پاکستان کو چاہیے کہ وہ انکار کی بجائے ذمہ دار افراد کے خلاف ٹھوس کارروائی کرے‘۔ چندی گڑھ میں صحافیوں سے بات کرتے ہوئے انہوں نے کہا کہ ’ ہم نے پاکستان کو کافی ثبوت دے دیے ہیں اور یہ بات قابلِ مذمت ہے کہ پاکستان ان ثبوتوں کو ماننے سے انکار کر کے عالمی برادری کی بھی توہین کر رہا ہے‘۔

یاد رہے کہ چھبیس نومبر کو ممبئی میں حملوں کے بعد پاکستانی حکام نے دسمبر کے اوائل میں پاکستان کے زیرِ انتظام کشمیر سے کالعدم تنظیم لشکرِ طیبہ کے رہنماؤں ذکی الرحمان لکھوی اور ضرار شاہ کو حراست میں لے لیا تھا جبکہ مذہبی تنظیم جماعت الدعوۃ کے سربراہ حافظ سعید کو ان کی رہائشگاہ پر نظربند کر دیا گیا تھا۔