ریاض سہیل بی بی سی اردو ڈاٹ کام، کراچی

	میاں محمد سومرو بھی مارچ میں ریٹائر ہورہے ہیں

الیکشن کمیشن کا کہنا ہے کہ جنوری کی پہلے ہفتے میں سینیٹ کی ان نشستوں پر انتخاب کا شیڈول جاری کیا جائے گا اور بارہ مارچ کو نئے سینیٹر حلف لیں گے۔

سیکریٹری الیکشن کمیشن کنور دلشاد نے جمعہ کو کراچی میں میڈیا سے بات کرتے ہوئے بتایا کہ سینیٹ کا الیکٹورل کالج جو قومی اسمبلی اور چاروں صوبائی اسمبلیاں پر مشتمل ہے، مکمل ہے ۔

دس فروری اور گیارہ مارچ کے درمیان میں ان پچاس نشتسوں پر انتخاب ہوں گے، ان میں گیارہ نشستیں ہر صوبے کی ہیں، چار فاٹا اور دو اسلام آباد کی نشستوں پر انتخابات ہوں گے۔ تمام مراحل مکمل ہونے کے بعد بارہ مارچ کو نئے سینیٹر حلف اٹھائیں گے۔

سینیٹ کی ویب سائیٹ پر موجود معلومات کے مطابق مارچ دو ہزار نو میں سینیٹ کے چیئرمین محمد میاں سومرو، وفاقی وزیر قانون فاروق نائیک، اٹارنی جنرل آف پاکستان سردار لطیف کھوسہ، مولانا عبدالغفور حیدری، مشاہد حسین سید، نثار میمن، خالد رانجھا، اقبال ظفر جھگڑا، مولانا سمیع الحق، پروفیسر ساجد میر، حاجی محمد عدیل، آغا پری گل، علامہ عباس کمیلی، انیسہ زیب خیلی، بابر غوری، چودھری انور بھنڈر، محمد علی بروہی، حافظ عبدالمالک قادری، امین دادا بھائی، انور بیگ، رضا محمد رضا اور ظفر چودھری سمیت پچاس سینیٹر رٹائرڈ ہوجائیں گے۔

سینیٹ کے ان انتخابات کے بعد چیئرمین سینیٹ کو منتخب کیا جائے گا۔ چاروں صوبوں میں اس وقت مختلف صورتحال ہے، سندھ میں پیپلز پارٹی، پنجاب میں مسلم لیگ ن اور سرحد میں عوامی نیشنل پارٹی کو واضح اکثریت حاصل ہے۔ جبکہ اے پی ڈی ایم میں شامل مذہبی اور قوم پرست جماعتوں کے بائیکاٹ کے باعث وہ ان انتخابات سے باہر رہیں گی۔