شہزاد ملک بی بی سی اردو ڈاٹ کام، اسلام آباد

	اراکین کی شکایت تھی کہ صدر مشرف کے استعفے کے بعد بھی پالیسی تبدیل نہیں کی گئی ہے۔

پیر کو سینیٹ کے اجلاس میں بلوچستان سے تعلق رکھنے والے اسراراللہ زہری نے کہا کہ جنرل ریٹائرڈ پرویز مشرف کے مستعفی ہونے کے بعد بھی پیپلز پارٹی نے اُن کی پالیسیوں کو تبدیل نہیں کیا۔ انہوں نے کہا کہ بلوچستان میں جاری آپریشن کو فوری بند کیا جائے۔

اے این پی کے سینیٹر حاجی عدیل احمد نے کہا کہ بلوچستان کے صورتحال کے حل کے سلسلے میں ایک پارلیمانی کمیٹی بنائی جائے جو دس روز کے اندر اپنی رپورٹ پیش کرے۔ انہوں نے کہا کہ پارلیمانی پارٹی اس بات کا تعین کرے گی کہ وہاں پر آپریشن کس کی ایما پر کیا جارہا ہے۔

انہوں نے کہا کہ وہاں کے لوگوں کو ابھی تک یہ علم نہیں ہے کہ اُن کے خلاف کون کارروائی کر رہا ہے۔

سینیٹر کلثوم پروین نے کہا کہ بڑی مشکل سے بلوچستان کے لیے نوکریوں کا کوٹہ بڑھایا گیا لیکن اب نہ صرف کوٹہ ختم کیا جا رہا ہے بلکہ ان علاقوں کے افسران کو او ایس ڈی بنایا جا رہا ہے۔

ڈاکٹر سعد نے باجوڑ کی صورتحال کا ذکر کرتے ہوئے کہا چھ اگست تک اُس علاقے میں امن تھا لیکن اس کے بعد حکومت کی طرف سے ہیلی کاپٹروں کے ذریعے پیمفلٹ تقسیم کیے گئے جن میں کہا گیا کہ اگر کوئی گاڑی سڑک پر چل رہی ہے اور اگر ہیلی کاپٹر وہاں فضا میں اڑتا ہوا نظر آتا ہے تو گاڑی میں سوار تمام افراد باہر نکل آئیں اور ہاتھ اُوپر کرکے کھڑے ہوجائیں اور اگر کسی نے ہاتھ نہ اُٹھائے تو اُس کو گولی مار دی جائے گی۔

انہوں نے کہا کہ پیمفلٹ میں مزید یہ بھی کہا گیا ہے کہ اگر کسی کے پاس اسلحہ موجود ہوا تو اُسے وہیں پر گولی مار دی جائے گی۔

سینیٹ میں قائد ایوان رضا ربانی نے کہا کہ بلوچستان پاکستان کا ایک اہم صوبہ ہے اور انہوں نے قیام پاکستان میں بلوچ عوام نے بڑا اہم کردار ادا کیا ہے انہوں نے کہا کہ پرویز مشرف کے جانے کے بعد بلوچستان کے بارے میں پالیسیاں تبدیل کرنے میں کچھ وقت لگے گا۔

انہوں نے کہا کہ داخلہ امور کے بارے میں وزیر اعظم کے مشیر رحمان ملک اس ماہ کی اٹھائس تاریخ کو کوئٹہ جائیں گے جہاں پر وہ امن وامان کی صورتحال کے بارے میں تمام سیاسی جماعتوں کو بریفنگ دیں گے ۔