ایوب ترین کوئٹہ

	پولیس حکام اور مظاہرین کے درمیان مذاکرات ہو رہے تھے کہ اچانک فائرنگ شروع ہوگئی

ہفتہ کی صبح گیارہ بجے نامعلوم مسلح افراد نے بروری کے علاقے کلی کرانی میں بعض نامعلوم مسلح افراد سے گاڑی چھیننے کی واردات کے دوران مزاحمت کرنے پر فائرنگ کر کے عارف عباس کو ہلاک جبکہ خادم حسین کو زخمی کردیا۔

ہلاک ہونے والے کی لاش اور زخمی شخص کو بولان میڈیکل ہسپتال پہنچایا گیا۔ واقعہ کی اطلاع ملنے پر مقتول کے ورثاء بڑی تعداد ہسپتال پہنچی اور ہسپتال کے سامنے ٹائر جلا کر بروری روڈ کو بلاک کر دیا۔

اس دوران انسداد دہشتگردی فورس (اے ٹی ایف )اور پولیس کی نفری روڈ کھلوانے پہنچ گئی۔ پولیس حکام اور مظاہرین کے درمیان مذاکرات ہو رہے تھے کہ اچانک پولیس اور مشتعل مظاہرین کے درمیان فائرنگ شروع ہوئی جس کے نتیجے میں اے ٹی ایف کا اہلکار لطیف چنگیزی اور پولیس اہلکار ذاکر حسین زخمی ہو گئے۔

اے ٹی ایف اور پولیس نے جوابی فائرنگ کر دی اور آنسو گیس شیلنگ کی۔ فائرنگ کے تبادلے میں دو مظاہرین عارف حسین اور علی رضا ہلاک جبکہ دس افراد زخمی ہوگئے جن میں ریاض، حسین، حسن رضا، اصغر علی، حیات اللہ، علی حسن اور ایک خاتون خدیجہ شامل ہیں۔

زخمی اہلکاروں کو سول ہسپتال کوئٹہ جبکہ دیگر زخمیوں کو بولان میڈیکل کمپلیکس منتقل کردیا گیا۔ شدید فائرنگ کے بعد علاقے میں زبردست خوف و ہراس پھیل گیا اور کرانی روڈ، بروری روڈ اور دیگر قریبی علاقوں میں تمام دکانیں اور مارکیٹیں بند ہوگئیں جبکہ لوگ بھی گھروں تک محصور ہوگئے۔

دو مظاہرین کی ہلاکت کے بعد لوگوں میں سخت اشتعال پھیل گیا جبکہ پولیس نے علاقے میں تلاش شروع کر کے متعدد مشتبہ افراد کو حراست میں لے لیا۔

ادھر بلوچستان کے علاقے اوچ میں ایک دھماکے میں پاکستانی سیکورٹی فورسز کا ایک اہلکار امجد ہلاک ہوا ہے۔

اپنے آپ کو بلوچ ربپلیکن آرمی کے ترجمان ظاہر کرنے والے سر باز بلوچ نے واقعہ کی ذمہ داری قبول کر تے ہوئے دعویٰ کیا ہے کہ یہ کارروائی اس سرچ آپریشن کے درعمل کے طور پر کی گئی جو بقول ان کے پاکستانی فورسزنے گزشتہ دنوں اوچ اور لوٹی کے علاقوں میں ’بے گناہ‘ بلوچوں کے خلاف شروع کر رکھی ہے۔