عزیزاللہ خان بی بی سی اردو ڈاٹ کام، کوئٹہ

	کوئٹہ میں اس وقت متعدد ہڑتالی کیمپ لگے ہوئے ہیں

بلوچ نیشنل فرنٹ (بی این ایف) میں بلوچ سٹوڈنٹس آرگنائزیشن، بلوچ نیشنل موومنٹ اور بلوچ ریپبلکن پارٹی سمیت آٹھ جماعتیں اور تنظیمیں شامل ہیں۔

مظاہرین نے لاپتہ افراد کی تصویریں اٹھا رکھی تھیں اور حکومت کے خلاف سخت نعرے بازی کی۔ مقررین کا کہنا تھا کہ خفیہ ایجنسی کے اہلکار لاپتہ افراد کو اٹھا کر لے جاتے ہیں جنہیں نہ تو عدالت میں پیش کیا جاتا ہے اور نہ ہی تھانے میں رکھا جاتا ہے۔

بی این ایف کے رہنما صادق رئیسانی ایڈووکیٹ نے کہا ہے کہ سنیچر کے روز ستر کے لگ بھگ بگٹی قبیلے کے لوگوں کو چمن میں گرفتار کر لیا گیا جن میں بیشتر خواتین اور بچے ہیں۔ انہوں نے کہا کہ یہ لوگ روزگار کی تلاش میں چمن گئے تھے۔

اس کے علاوہ بےروزگار افراد نے روزگار کی فراہمی اور شہریوں نے پانی کی عدم دستیابی اور بجلی کی لوڈ شیڈنگ کےخلاف مظاہرے کیے ہیں۔

ان دنوں کوئٹہ پریس کلب کے سامنے کوئی آدھ درجن کے قریب علامتی بھوک ہڑتال کے کیمپ لگے ہوئے ہیں ان میں ایک طالبعلم ثناءاللہ یلانزئی کی بازیابی کے بارے میں دو کیمپ، اساتذہ اور کلرکوں کے بڑھتی ہوئی مہنگائی کے خلاف اور تنخواہوں میں اضافے کے لیے کیمپ لگائے گئے ہیں۔

فارماسِسٹ مسیحی برادری کے نمائندوں نے بھی کیمپ لگائے ہیں جبکہ ایک کیمپ گزشتہ سال تربت میں سیلاب سے متاثرہ افراد نے لگایا تھا۔ یہ کیمپ سنیچر کو بند کر دیا گیا۔ تربت سے کوئی چھ نوجوانوں نے کوئٹہ پریس کلب کے سامنے کیمپ لگا کر صوبائی اور وفاقی حکومت سے مطالبہ کیا کہ ان متاثرین کی امداد کی جائے۔

جنوبی بلوچستان کے بیشتر علاقوں میں ایک سال گزر جانے کے باوجود بڑی تعداد میں لوگ اب بھی بے سرو سامانی کی حالت میں کھلے آسمان تلے پڑے ہیں جہاں بیماریاں عام ہیں اور خوراک نہیں ہے۔