سید شعیب حسن بی بی سی نیوز اسلام آباد

	پشاور میں ان ٹرک اڈوں پر حملوں میں سینکڑوں کی تعداد میں ٹرک تباہ ہو گئے تھے

پاکستان کے صوبے سرحد میں ٹرک ڈرائیوروں نے افغانستان جانے سے انکار نیٹو اور امریکی فوجوں کے لیے رسد اور کمک لیے جانے والے قافلوں پر حالیہ دنوں میں حملوں اور ڈرائیوروں کو یرغمال بنانے کے متعدد واقعات کے بعد کیا ہے۔

افغانستان میں تعینات امریکی اور نیٹو افواج کو سازو سامان اور کھانے پینے کی اشیاء کی فراہمی کا پچھہتر فیصد حصہ پاکستان کے صوبے سرحد کے راستے افغانستان پہنچایا جاتا ہے۔

طالبان کے خلاف کارروائیوں میں مصروف امریکی اور نیٹوافواج کے لیے یہ رسد انتہائی ضروری ہے۔

درجنوں سکیورٹی اہلکاروں کی حفاظت میں افغانستان جانے والے قافلے میں شامل ڈرائیوروں نے کہا کہ وہ آخری مرتبہ رسد لے کر افغانستان جا رہے ہیں۔

ٹرانسپورٹروں کی مقامی تنظیم نے بھی فیصلہ کیا ہے کہ وہ افغانستان غیر ملکی افواج کے لیے رسد لیجانے کا کام روک دیں گے۔

ستمبر دو ہزار آٹھ کے بعد سے طالبان نے غیر ملکی افواج کو کمک لیجانے والے ٹرکوں کو نشانہ بنانا شروع کر دیا تھا۔

طالبان نے کئی مرتبہ ان قافلوں پر حملہ کرکے ان پر لدا ہوا سازوسامان لوٹ لیا اور ڈرائیوروں کو یر غمال بنالیا۔

خیبر ٹرانسپورٹ ایسوسی ایشن کے صدر شاکر آفریدی نے کہا کہ افغانستان میں انتہائی مخدوش سکیورٹی صورت حال کی وجہ سے ان کے لیے کام جاری رکھنا ممکن نہیں رہا۔

انہوں نے کہا کہ ان کے ٹرک آخری مرتبہ افغانستان جارہے ہیں اور وہ بھی اس لیے کہ ان پر سامان لادا جا چکا ہے۔

انہوں نے کہا کہ طالبان کی طرف سے حملوں کی وجہ سے وہ کسی ایسے قافلے کے ہمراہ اپنے ٹرک افغانستان نہیں بھیجیں گے جس میں غیر ملکی فوجیوں کے لیے رسد لیجانے والے ٹرک بھی شامل ہوں۔

شاکر آفریدی نے کہا کہ جب تک افغانستان جانے والی سڑکوں پر حکومتی عملداری بحال نہیں ہوتی وہ اپنے ٹرکوں کو خطرے میں نہیں ڈالیں گے۔

یہ فیصلہ نیٹو اور امریکی افواج کے لیے انتہائی مسائل پیدا کر سکتا ہے۔ افغانستان میں نیٹو اور امریکی فوجی حکام اپنی افواج کو رسد پہنچانے کے لیے متبادل راستے تلاش کرنے کی کوشش کر رہے ہیں۔