رفعت اللہ اورکزئی بی بی سی اردو ڈاٹ کام، پشاور

درجنوں مسلح افراد رات کے تاریکی میں بلال ٹرمینل میں کھڑی ٹرکوں پر تیل چھڑک کر اسے آگ لگائی: سرکاری اہلکار

پشاور میں اڑتالیس گھنٹے میں نیٹو اور امریکی سپلائی پر دوسرا حملہ ہے۔

گزشتہ روز بھی دو ٹرمینلز پر حملوں میں نیٹو افواج کے سازوسامان سمیت دو سو سے زائد گاڑیاں تباہ کی گئیں تھیں۔

تازہ واقعہ پشاور کے علاقے رنگ روڈ پر پندو چوک کے قریب گزشتہ رات تین بجے کے قریب پیش آیا۔ تھانہ یکہ توت کے ایک اہلکار فدا محمد بی بی سی کو بتایا کہ درجنوں مسلح افراد رات کے تاریکی میں اچانک بلال ٹرمینل میں داخل ہوئے اور وہاں کھڑی ٹرکوں پر تیل چھڑک کر اسے آگ لگائی۔

انہوں نے کہا کہ مسلح افراد نے ٹرمینل پر راکٹ فائر نہیں کئے بلکہ کوئی جلتی ہوئی چیز پھینکی گئی جس سے وہاں آگ بھڑک اٹھی۔

ٹرمینل کے ایک ہلکار نے بتایا کہ علاقے میں ان کے محافظ بھی موجود تھے تاہم انہیں بالکل معلوم نہیں ہوسکا کہ مسلح افراد کیسے اچانک ٹرمینل کے اندر داخل ہوئے۔ انہوں نے کہا کہ آگ اتنی تیزی سے پھیلی کہ اس نے چند ہی منٹوں میں سارے علاقے کو گرے میں لے لیا۔

اہلکار نے بتایا کہ آگ سے پچاس سے زائد ٹرک مکمل طورپر تباہ تبدیل ہوگئے ہیں۔ انہوں نے کہا ٹرکوں پر فوجی سازوسامان نہیں لدھا ہوا تھا بلکہ ساری گاڑیاں خالی تھی۔

پشاور میں نیٹو افواج کو سامان رسد لے جانے والی گاڑیوں پر گزشتہ دو دن میں یہ دوسرا مسلسل حملہ ہے۔

سنیچر کی رات بھی رنگ روڈ پر تقریباً تین سو کے قریب مسلح افراد نے اتحادی افواج کو فوجی اور دیگر سازوسامان لے جانے والے گاڑیوں پر راکٹ لانچروں اور دیگر خودکار ہتھیاروں سے حملہ کیا تھا جس میں دو سے زائد کنٹنیرز تباہ ہوگئے تھے۔ ان گاڑیوں میں بکتر بند اور دیگر گاڑیاں شامل تھیں۔

دوسری طرف پشاور میں ان مسلسل حملوں سے شہر کے لوگوں میں سخت تشویش کی لہر دوڑ گئی ہے۔ مسلح افراد جس دیدہ دلیری سے پشاور کے اندر حملے کر رہے ہیں اس سے بظاہر لگتا ہے کہ صوبائی حکومت ان حملوں کو روکنے میں بے بس نظر اتی ہے۔