عبدالحئی کاکڑ بی بی سی اردوڈاٹ کام، پشاور

	پولیس نے گاڑی پر پیچھے سے اندھا دھند فائرنگ کی جس کے بعد دھماکہ ہوا

شمالی وزیرستان میں طالبان کے حافظ گل بہادر گروپ نے حملے کی ذمہ داری قبو ل کرتے ہوئے کہا ہے کہ یہ قبائلی علاقوں میں جاری مبینہ امریکی میزائل حملوں کے ردعمل میں کیا گیا ہے۔

بنوں کے پولیس سربراہ محمد عالم شنواری نے بی بی سی کو بتایا کہ شہر سے تقریباً پانچ کلومیٹر دور ٹاؤن چوک پر گاڑی میں سوار ایک مبینہ خودکش بمبار نے بارود سے بھری گاڑی ایک دھماکے کے ساتھ اڑادی جس کے نتیجے میں سات افراد ہلاک ہوگئے ہیں۔

ان کے مطابق ہلاک ہونے والوں میں ایک پولیس اہلکار بھی شامل ہے۔ تاہم ایک اور اہلکار نے بتایا کہ مرنے والے پولیس اہلکاروں کی تعداد چار ہے۔

بنوں سول ہسپتال کے ڈاکٹر نور سعید نے بی بی سی کو بتایا کہ ان کے پاس پانچ لاشیں اور چودہ زخمی لائے گئے ہیں جن میں سے بعض کی حالت تشویشناک بتائی جارہی ہے۔ زخمیوں میں چار پولیس اہلکار بھی شامل ہیں۔

واقعہ میں معمولی زخمی ہونے والے ایک شہری فریداللہ نے بی بی سی کو بتایا کہ مغرب کے وقت وہ اپنے گاڑی میں جا رہے تھے کہ پیچھے سے آنے والی ایک تیز رفتار گاڑی ان کی گاڑی کے ساتھ ٹکرا کر آگے نکل گئی۔ ان کے بقول انہوں نے ساتھ کھڑے پولیس اہلکاروں کو آواز دی کہ یہ مبینہ خودکش بمبار ہے کیونکہ اس گاڑی کی ڈرائیوونگ سیٹ دائیں سے نہیں بلکہ بائیں طرف سے تھی۔

گاڑی تیرہ سالہ بچہ چلا رہا تھا  مبینہ خودکش بمبار کی گاڑی بارود سے بھری ہوئی تھی جس کی وجہ سے ایک زوردار دھماکہ ہوا۔ ان کے مطابق بارود سے بھری گاڑی ایک تقریباً تیرہ سالہ بچہ چلا رہا تھا ایک شہری فریداللہ

ان کے مطابق مبینہ خودکش بمبار کی گاڑی بارود سے بھری ہوئی تھی جس کی وجہ سے ایک زوردار دھماکہ ہوا۔ ان کے مطابق بارود سے بھری گاڑی ایک تقریباً تیرہ سالہ بچہ چلا رہا تھا۔

پاکستان کے قبائلی علاقے شمالی وزیرستان میں سرگرم طالبان کے حافظ گل بہادر گروپ کے ترجمان احمد اللہ احمدی نے بی بی سی سے بات کرتے ہوئے اس حملے کی ذمہ داری قبول کرلی۔ ان کے بقول حملہ قبائلی علاقوں میں مبینہ طور پر جاری امریکی میزائل حملوں کے ردعمل میں کیا گیا ہے۔

انہوں نے دھمکی دی کہ اگر امریکی حملوں کا سلسلہ جاری رہا تو وہ اس قسم کے مزید حملے بندوبستی علاقوں میں کریں گے۔ انہوں نے کہا کہ حکومت کے ساتھ ان کا امن معاہدہ بدستور برقرار ہے لیکن حکومت کو امریکہ پر دباؤ ڈال کر میزائل حملے بند کرانے چاہیں۔