عزیزاللہ خان بی بی سی اردو ڈاٹ کام، کوئٹہ

	ڈیرہ بگٹی سے پولیس اہلکاروں نے بتایا ہے کہ نامعلوم افراد نے فرنٹییر کور کے اہلکاروں پر حملہ کیا

ڈیرہ بگٹی سے پولیس اہلکاروں نے بتایا ہے کہ نامعلوم افراد نے فرنٹییر کور کے اہلکاروں پر حملہ کیا ہے جس میں ایف سی کا ایک اہلکار ہلاک اور تین زخمی ہوئے ہیں۔

اس کے بعد فرنٹییر کور کے اہلکاروں نے جوابی کارروائی کی ہے جس میں ایک حملہ آور ہلاک ہوگیا ہے۔

ایسی اطلاعات ہیں کہ دونوں جانب سے فائرنگ کا تبادلہ دوپہر تک جاری تھا۔

ڈیرہ بگٹی سے مقامی لوگوں نے بتایا ہے کہ ایف سی کے اہلکار دشت گوران کے علاقے میں مشتبہ افراد کی گرفتاری کے لیے گئے تھے کہ اس دوران ان پر حملہ ہوا ہے۔

ڈیرہ بگٹی سو ئی اور قریبی علاقوں میں کچھ دنوں سے کشیدگی پائی جاتی ہے جہاں ایک ماہ میں پانچ سے زیادہ افراد ہلاک اور تقریبا دس مختلف حملوں میں متعدد افراد زخمی ہوئے ہیں۔

	ڈیرہ بگٹی سو ئی اور قریبی علاقوں میں کچھ دنوں سے کشیدگی پائی جاتی ہے

اس کے علاوہ کوئٹہ کے قریب دشت کے علاقے میں پنجابی امام بارگاہ کے امام کے قتل کے حوالے سے شیعہ برادری نے احتجاج کیا ہے۔

احتجاجی ریلی علمدار روڈ سے روانہ ہوئی اور مظاہرین نے گورنر ہاؤس کے سامنے دھرنا دیا ہے ۔ مظاہرین میتوں کو ساتھ لے کر گورنر ہاؤس کے سامنے پہنچے ہیں جہاں ریلی میں مظاہرین حملہ آوروں کی گرفتاری کا مطالبہ کرتے رہے۔

شیعہ رہنما رحیم جعفری نے بتایا ہے کہ وہ گورنر ہاؤس میں یاداشت پیش کریں گے جس میں ان کا مطالبہ ہے کہ کالعدم تنظیموں کے خلاف کارروائی کی جائے اور مطلوب افراد کو فوری طور پر گرفتار کیا جائے۔

یاد رہے گزشتہ روز مچھ شہر کی امام بارگاہ میں جمعہ نماز پڑھانے کے بعد علامہ حس زاکری اپنے محافظ کے ہمراہ واپس آرہے تھے کہ دشت کے قریب نامعلوم افراد نے ان پر فائرنگ کی ہے جس میں دونوں ہلاک ہو گئے ہیں۔ شیعہ رہنماوں کے مطابق کوئٹہ میں ٹارگٹ کلنگ کے واقعات میں اضافہ ہوا ہے۔