اعجاز مہر بی بی سی اردو ڈاٹ کام، اسلام آباد

	جنرل کیانی نے حال میں کئی بیرونی دورے کیے ہیں

جنرل کیانی نیٹو کی ملٹری کمیٹی کے سربراہ ایڈمرل گیام پاؤلو کی دعوت پر ’چیفس آف ڈیفنس، کے اجلاس میں شرکت کریں گے۔

پاکستانی فوج کے تعلقات عامہ کے شعبہ سے جاری ہونے والے بیان میں بتایا گیا ہے کہ جنرل اشفاق پرویز کیانی ملکی مفادات کے پیش نظر خطے کی سلامتی کے پیچدہ معاملات اور انہیں ایک جامع سوچ سے حل کرنے کی ضرورت پر تبادلہ خیال کریں گے۔

بیان کے مطابق پاکستانی کمانڈر نیٹو کے حکام سے قبائلی علاقوں میں بعیر پائلٹ والے طیاروں سے حملوں سے پیدا ہونے والی الجھنوں پر بھی بات چیت کریں گے۔

ملٹری کمیٹی، نیٹو کا اعلیٰ ترین مشاورتی فورم ہے، جس کے اجلاس مختلف معاملات پر وقتاً فوقتاً منعقد کیے جاتے ہیں۔

پاکستان بری فوج کے سربراہ تین روزہ دورے پر آج برسلز پہنچیں گے اور امکان ہے کہ وہ بیس نومبر کو واپس وطن آئیں گے۔ جنرل اشفاق پرویز کیانی نے حال ہی میں چین، ترکی اور سعودی عرب کے بھی دورے کیے ہیں۔

بعض دفاعی مبصرین کا خیال ہے کہ جنرل اشفاق پرویز کیانی کی کوشش ہوگی کہ وہ دہشت گردی کے خلاف جنگ میں امریکہ کے ایک بڑے اتحادی نیٹو اور دیگر ممالک کے ذریعے امریکہ کی نئی انتظامیہ کو قائل کیا جاسکے کہ قبائلی علاقوں پر امریکی حملوں سے مسائل حل نہیں ہوں گے۔

یاد رہے کہ پاکستان پر بغیر پائلٹ طیاروں سے حملوں کے سوال پر برطانیہ، فرانس اور نیٹو کے کمانڈر پہلے ہی لا تعلقی ظاہر کر چکے ہیں اور ان کے مختلف نمائندے یہ بھی کہہ چکے ہیں وہ پاکستان کی خودمختاری کا احترام کرتے ہیں۔