اعجاز مہر بی بی سی اردو ڈاٹ کام، اسلام آباد

	’ملکی سلامتی سے کسی کو بھی کھیلنے کی اجازت نہیں دی جائے گی‘

ایک سرکاری اعلان کے مطابق صدر آصف زرداری نے آٹھ اکتوبر کو قومی اسمبلی اور سینیٹ کا مشترکہ اجلاس طلب کر لیا ہے جس میں رکن پارلیمان کو بند کمرے میں ملک میں امن و عامہ کی صورتحال پر بریفنگ دی جائے گی۔

پارلیمنٹ کا مشترکہ اجلاس بلانے کا فیصلہ صدر ، وزیر اعظم اور چیف آف آرمی سٹاف کی میٹنگ میں کیا گیا۔

صدر آصف زرداری، وزیر اعظم یوسف رضا گیلانی، چیف آف آرمی سٹاف جنرل اشفاق پرویز کیانی اور اے این پی کے لیڈر اسفندیار کی ملاقات کے بعد صدر ہاؤس کے ترجمان نے بی بی سی کو بتایا کہ ملک میں امن و امان کی بحالی تک دہشتگردی کے خلاف جنگ جاری رہے گی۔

ایوان صدر کے ایک ترجمان نے بی بی سی کو بتایا کہ صدر اور آرمی چیف کی ملاقات میں بعد میں وزیراعظم سید یوسف رضا گیلانی اور عوامی نیشنل پارٹی کے صدر اسفند یار ولی بھی شامل ہوگئے۔

آرمی چیف نے صدر آصف علی زرداری کو قبائلی علاقوں میں جاری فوجی کارروائیوں اور مقامی قبائل کے سکیورٹی فورسز کے ساتھ تعاون کی تفصیلات سے آگاہ کیا۔

ذرائع کے مطابق ملاقات میں یہ طے پایا کہ حکومت فوری طور پر سکیورٹی فورسز کی مدد کرنے والے قبائلی لشکروں کو مکمل تعاون فراہم کرے گی تاکہ شدت پسندوں کا صفایا کیا جاسکے۔ آصف علی زرداری نے اس موقع پر کہا کہ ملکی سلامتی سے کسی کو بھی کھیلنے کی اجازت نہیں دی جائے گی اور شدت پسندوں کے خلاف کارروائی جاری رہے گی۔

اسفند یار ولی ایوانِ صدر میں  اسفندیار ولی خودکش حملے کے بعد صدر آصف علی زرداری کی درخواست پر ہیلی کاپٹر کے ذریعے اسلام آباد آ گئے تھے اور اطلاعات کے مطابق وہ ایوان صدر میں قیام پذیر ہیں۔

ایوان صدر کے ذرائع کے مطابق اسفند یار ولی نے اپنے اوپر ہونے والے خود کش حملے کی تفصیل سے شرکاء کو آگاہ کیا۔ جس پر صدر آصف علی زرداری نے کہا کہ یہ ملک کی پاپولر سیاسی قیادت پر وار ہے اور اُسے سب کو مل کر ناکام بنانا ہوگا۔ ذرائع کے مطابق آرمی چیف نے اسفند یار ولی پر ہونے والے حملے کی مذمت کی اور تحقیقات میں فوج کی مدد فراہم کرنے کا بھی یقین دلایا۔

واضح رہے کہ عید کے دوسرے روز ولی باغ میں جب اسفند یار ولی جب لوگوں سے عید مل رہے تھے تو ایک خود کش حملہ آور نے انہیں نشانہ بنانے کی کوشش کی۔ لیکن اسفند یار ولی کے محافظوں نے بمبار کو آگے جانے نہیں دیا اور اس نے خود کو دھماکے سے اڑادیا تھا جس کے نتیجے میں چار افراد ہلاک ہوگئے تھے۔

حملے کے بعد صدر آصف علی زرداری کی درخواست پر اسفند یار ولی ہیلی کاپٹر کے ذریعے اسلام آباد آ گئے تھے اور اطلاعات کے مطابق وہ ایوان صدر میں قیام پذیر ہیں۔