رفعت اللہ اورکزئی بی بی سی اردو ڈاٹ کام، پشاور

	طالبان کے ترجمان مسلم خان نے پندرہ سکیورٹی اہلکار کی ہلاکت کا دعویٰ کیا ہے

طالبان نے تصدیق کی ہے کہ ہلاک ہونے والوں میں عسکریت پسند بھی شامل ہیں۔

سوات کے ضلعی پولیس افسر دلاور بنگش کے مطابق یہ واقعہ گزشتہ روز تحصیل کبل کے علاقے سر سینڑی میں پیش آیا جبکہ لڑائی رات گئے تک جاری رہی۔

انہوں نے کہا کہ فرنٹیئر کانسٹیبلری کاایک قافلہ اسلحہ اور راشن لیکر کبل سے توتانو بانڈے جارہا تھا کہ سر سینڑی کے مقام پر مسلح طالبان نے قافلے پر دھماکہ خیز مواد سے حملہ کیا جس میں دو ایف سی اہلکار موقع ہی پر ہلاک ہوگئے۔

انہوں نے مزید کہا کہ حملے کے بعد قافلے پر راکٹ فائر کئے گئے جس سے سرکاری گاڑیوں میں موجود اسلحہ میں آگ لگنے سے تین گاڑیاں تباہ ہوگئیں۔ انہوں نے کہا کہ سکیورٹی اہلکاروں نے بھی جوابی کارروائی کی اور اس طرح یہ جھڑپ رات گئے تک جاری رہی۔

دلاور بنگش نے بتایا کہ حملے میں اے ایس آئی نور زمان سمیت پانچ اہلکار ہلاک ہوگئے۔ انہوں نے کہا کہ حملے میں سات عسکریت پسند بھی مارے گئے جبکہ ایک طالبان کمانڈر سردار علی کو زخمی حالت میں گرفتار کرلیا گیا ہے۔

تاہم دوسری طرف سوات میں طالبان کے ترجمان مسلم خان نے اس حملے میں پندرہ سکیورٹی اہلکار کی ہلاکت کا دعویٰ کیا ہے۔ انہوں نے کہا کہ جھڑپ میں پانچ طالبان بھی ہلاک ہوئے ہیں۔ ترجمان کا کہنا تھا کہ طالبان نے ایف سی کے ایک اہلکار کو زندہ گرفتار کرلیا ہے۔

عینی شاہدین کا کہنا ہے کہ قافلے پر حملے کے بعد وہاں آگ لگ گئی اور دونوں جانب شدید فائرنگ کا سلسلہ رات گئے تک جاری رہا۔

مقامی صحافیوں کا کہنا ہے کہ سکیورٹی اہلکاروں کی لاشیں بدھ کی دوپہر تک سرسینڑی میں پڑی رہیں ۔ تاہم بعد میں سوات امن کمیٹی کے ارکان نے جائے وقوعہ جاکر لاشیں اٹھائیں اور سکیورٹی فورسز کے حوالے کیں۔