عبدالحئی کاکڑ بی بی سی اردوڈاٹ کام، پشاور

	سوات میں طالبان بہت سے سکولوں کو تباہ کر چکے ہیں

سوات طالبان کے ترجمان مسلم خان نے بی بی سی سے بات کرتے ہوئے کہا کہ گزشتہ شب ان کے ایک ساتھی نے بارود سے بھری ایک گاڑی سے مینگورہ پولیس اسٹیشن پر حملہ کیا ہے۔ ان کے بقول جب تک سوات میں فوجی کاروائی جاری رہتی ہے سکیورٹی فورسز اور سرکاری املاک کو حملوں کا نشانہ بنایا جائے گا۔

حکام کا کہنا ہے کہ دھماکے میں تباہ ہونے والی پولیس اسٹیشن کی عمارت کے ملبے سے ایک پولیس اہلکار کی لاش جمعرات کی صبح نکالی گئی ہے جس کے ساتھ ہی اس واقعے میں مرنے والے اہلکاروں کی تعداد چارہوگئی ہے۔ان کے بقول انتیس کے قریب اہلکار زخمی بھی ہوئے ہیں جنہیں سیدو شریف ہسپتال میں طبی امداد فراہم کی جارہی ہے۔

عینی شاہدین کا کہنا ہے کہ مبینہ خودکش حملے سے قبل پولیس اسٹیشن پر نامعلوم مقام سے راکٹ داغے گئے تھے۔جائے وقوعہ پر پہنچنے والے مقامی صحافی شیرین زادہ نے بی بی سی کو بتایا کہ دھماکے کی وجہ سے ڈیڑھ سو گز کے فاصلے پر واقع کئی عمارتوں کے شیشے اور کھڑکیاں ٹوٹ گئی ہیں جبکہ انہوں نے دو درجن سے زائد گاڑیوں کو جزوی نقصان پہنچتہ ہوئے دیکھاہے۔

سوات میں گزشتہ سال شروع کی جانے والی فوجی کاروائی کا تقریباً ایک سال پورا ہونے والا ہے لیکن تشدد کے واقعات میں کمی کی بجائے روز بروز اضافہ دیکھنے میں آرہا ہے۔
‘