ذوالفقار علی بی بی سی، اردو ڈاٹ کام، مظفرآباد

اتوار کو وادیِ نیلم کے علاقے اٹھ مقام میں بچوں نے عالمی امن دن کے موقع پر امن مارچ کی تھی

پاکستان کی فوج کے ایک ترجمان میجر مراد خان نے الزام عائد کیا ہے کہ لائن آف کنڑول کی دوسری جانب سے بھارتی فوج نے جنوبی ضلع راولاکوٹ میں ہیجرہ سیکڑ میں بلا اشتعال فائرنگ کی۔ انہوں نے مزید کہا کہ اس کے نتیجے میں لائن آف کنڑول کے قریب واقع سہر گاؤں کی ایک خاتون گولی لگنے کے باعث زخمی ہوگئیں۔

میجر مراد کا کہنا ہے کہ پاکستان کی فوج نے بھی جواب میں فائرنگ کی۔ انہوں نے مزید کہا کہ پاکستان نے ’بلااشتعال فائرنگ‘ پر بھارت سے احتجاج کیا ہے اور دونوں ملکوں کی فوجوں کے مقامی کمانڈروں کی فلیگ میٹنگ کا مطالبہ کیا تاکہ فائرنگ کی وجوہات معلوم کی جاسکیں۔

ہجیرہ کے اسسٹنٹ کمشنر محمد فرید کا کہنا ہے کہ بھارتی فوج کی طرف سے آدھے گھنٹے تک فائرنگ جاری رہی اور بھارتی فوج نے مارٹر اور مشین گن کا استعمال کیا۔

حالیہ مہینوں میں لائن آف کنڑول پر ہندوستان اور پاکستان کی فوج کے درمیان فائرنگ کے تبادلے کے کئی واقعات پیش آئے لیکن یہ پہلی مرتبہ ہے کہ اس کے نتیجے میں کوئی عام شہری زخمی ہوا ہو۔

ہندوستان اور پاکستان کے درمیان برسوں کی کشیدگی کے بعد نومبر سنہ دو ہزارتین میں متنازع کشمیر کو تقسیم کرنے والی لائن آف کنڑول پر فائر بندی کا معاہدہ ہوا تھا۔

اس دوران تقریباً ساڑھے چار سال تک لائن آف کنڑول پر عام طور پر صورت حال بہتر رہی اور فائرنگ کے تبادلے کے محض اکا دکا واقعات پیش آئے۔