دلاور خان وزیر
بی بی سی اردو ڈاٹ کام، ڈیرہ اسماعیل خان |  |
| | | گزشتہ دو ہفتوں سے پاکستان کے قبائلی علاقوں میں امریکی میزائل حملوں میں اضافہ ہوا ہے |
پاکستان کے قبائلی علاقے جنوبی وزیرستان کے سرحدی علاقے انگور اڈہ کے قریب افغانستان کے علاقے میں امریکی گن شپ ہیلی کاپٹروں اور جہازوں کی آمد پر انہیں کسی ممکنہ سرحدی خلاف ورزی سے باز رکھنے کے لیے پاکستان فوجیوں نے ہوائی فائرنگ کی۔ مقامی لوگوں کا کہنا ہے کہ اتوار کی رات وانا سے تیس کلومیٹر دور مغرب کی جانب انگور اڈہ کے جنوبی حصہ میں واقع زوبہ کے پہاڑی سلسلے کے قریب افغانستان کے علاقے میں سات امریکی گن شپ ہیلی کاپٹر اور دو چھاتہ بردار جہاز اترے اور فضاء میں ایک بی باون بھی چکر لگا رہا تھا۔ امریکی ہیلی کاپٹروں اور جہازوں کی آمد سے علاقے میں شدید خوف ہراس پھیل گیا۔ مقامی لوگوں کے مطابق امریکی گن شپ ہیلی کاپٹروں اور جہازوں کے اترنے کے بعد قریبی پہاڑی سلسلوں میں موجود پاکستانی فوج کے ٹھکانوں سے بگل بجائے گئے اور زوبہ، صدیق نارائی اور پش خینہ سے شدید فائرنگ بھی شروع ہوئی۔ مقامی انتظامیہ نےاس واقعہ کی تصدیق کی ہے لیکن اہلکاروں کا کہنا ہے کہ امریکی جہاز پاکستان کے علاقے میں داخل نہیں ہوئے ہیں اس لیے اس پر کسی تبصرے کی ضروت نہیں ہے۔ اطلاعات کے مطابق انگور اڈہ کی آبادی نے رات گھروں سے باہر گزاری ہیں۔ اطلاعات کے مطابق فائرنگ کی آواز سنی گئی ہے لیکن کسی جانی نقصان کی اطلاع نہیں ہے۔ اس دوران مقامی آبادی کو بھی معلوم ہوگیا کہ سرحد کے قریب امریکی جہاز پہنچ گئے ہیں۔ سرحد کے قریب ہزاروں لوگوں نے چند ہی گھنٹوں میں پورے علاقے کو خالی کر دیا۔ مقامی لوگوں کے مطابق ہزاروں کی آبادی نے اپنے بچے اور خواتین کو باغڑ کے علاقے میں منتقل کر دیا اور مردوں نے اسلحہ اٹھا کر مقابلے کے لیے پہاڑی سلسلوں میں مورچے سنھبال لیے ہوئے تھے۔ انہوں نے کہا کہ پیر کی صبح چار بجے امریکی گن شپ ہیلی کاپٹر اور جہاز مچاداد کوٹ واپس لوٹ گئے انہوں نے کہا امریکی جہازوں کے واپس لوٹنے کے بعد مقامی لوگ بھی واپس اپنے گھروں میں آگئے ہیں۔ یاد رہے کہ جنوبی؛ شمالی وزیرستان کے مختلف علاقوں پر گزشتہ دو ہفتوں سے امریکی میزائل حملے میں اضافہ ہوا ہے۔ تین ستمبر کو جنوبی وزیرستان کے علاقے انگور اڈہ میں امریکہ کی کارروائی کے دوران بیس عام شہری ہلاک ہو گئے تھے۔
| 
’امریکی حملہ شرمناک ہے‘
