دلاور خان وزیر
بی بی سی اردو ڈاٹ کام، ڈیرہ اسماعیل خان |  |
| | | میزائل سرحد کے قریب افغان حدود سے داغے گئے اور ان سے ایک مکان نشانہ بنا |
پاکستان کے قبائلی علاقے شمالی وزیرستان میں سرحد کے قریب افغان حدود سے داغے گئے تین میزائلوں سے پانچ افراد ہلاک اور چار زخمی ہوئے ہیں۔ حملے کے نتیجے میں ایک مکان بھی تباہ ہوگیا ہوا ہے۔ مقامی لوگوں کے مطابق مکان میں کچھ غیر ملکیوں کے علاوہ مقامی طالبان بھی رہائش پذیر تھے۔ مقامی انتظامیہ کا کہنا ہے کہ جمعرات کو شام چار بجے شمالی وزیرستان کے صدر مقام میران شاہ کے علاقہ چارخیل میں افغان سرحد کے قریب رحمن والی خان اور فرمان کے مکان پر تین میزائل گرے، جس کے نتیجہ میں پانچ افراد ہلاک اور چار زخمی ہوگئے ہیں۔ مقامی لوگوں کا کہنا ہے کہ مقامی طالبان نے لاشوں کو نامعلوم مقام پر منتقل کردیا ہے اس لیے یہ معلوم نہیں ہوسکا کہ ہلاک ہونے والے مقامی ہیں یا ان میں غیر ملکی بھی شامل ہیں۔ میزائل گرنے سے علاقے میں زبردست خوف و ہراس پھیل گیا ہے۔گزشتہ ایک ہفتے سے میران شاہ وانا اور ملحقہ علاقوں میں امریکی جاسوس طیاروں میں اضافہ ہوا ہے ایک ہی وقت میں تین سے زیادہ جاسوس طیارے گشت کرتے ہوئے دیکھے گئے ہیں۔ عام لوگ جاسوس طیاروں اور میزائل حملوں سے سخت پریشان ہیں۔ یادرہے کہ اس پہلے بھی کئی بار قبائلی علاقوں میں نامعلوم مقام کی جانب سے میزائل داغنے کے واقعات رونما ہوچکے ہیں۔ مقامی لوگ اس قسم کے واقعات کا الزام افغان حکومت یا امریکہ پر لگاتے ہیں۔لیکن حکومت پاکستان اس قسم کے واقعات کو محض ایک حادثہ قرار دیتے ہیں۔ گزشتہ روز جنوبی وزیرستان کے علاقہ انگوراڈہ میں امریکہ اور اتحادی فوج کے حملے میں کم از کم بیس عام شہری ہلاک ہوگئے تھے۔ | 
’امریکی حملہ شرمناک اور حیران کن ہے‘
