عزیزاللہ خان بی بی سی اردو ڈاٹ کام، کوئٹہ

	پی پی پی کے رہنما آصف زرداری کی کامیابی کے لیے سرتوڑ کوششیں کررہے ہیں

یہ قرار داد پیپلز پارٹی کے رہنما اور صوبائی وزیر صادق عمرانی پیش کریں گے۔ اسمبلی کے ذرائع نے بتایا ہے کہ اس قرارداد میں آصف علی زرداری کو صدر منتخب کرنے کے لیے پیش کی جائے گی۔

وزیر اعلیٰ بلوچستان نواب اسلم رئیسانی نے دعویٰ کیا ہے کہ بلوچستان اسمبلی کے پینسٹھ ارکان کے ایوان میں ساٹھ ووٹ ملیں گے۔

الیکشن کمیش کے مطابق اس وقت بلوچستان اسمبلی میں پیپلز پارٹی کے اراکین کی تعداد بارہ ہے جبکہ مسلم لیگ قائداعظم کے انیس، جمعیت علماء اسلام فضل الرحمان گروپ کے دس، عوامی نیشنل پارٹی کے چار، بلوچستان نیشنل پارٹی عوامی کے سات، نیشنل پارٹی کے ایک اور آزاد اراکین کی تعداد بارہ ہے۔

آزاد اراکین میں ایک رکن نے مسلم لیگ نواز میں شمولیت کا اعلان کیا تھا جبکہ مسلم لیگ قائد اعظم کے اٹھارہ اراکین نے پیپلز پارٹی کی حمایت کا اعلان کیا تھا جبکہ ایک رکن سابق وفاقی وزیر سردار یار محمد رند حزب اختلاف کے واحد رکن ہیں لیکن انہوں نے حلف لینے کے لیے پہلے اجلاس میں شرکت کی تھی اس کے بعد وہ کسی اجلاس میں شریک نہیں ہوئے۔

اب اس قرار داد کے لیے جمعیت علماء اسلام مسلم لگ قائد اعظم اور آزاد اراکین کیا فیصلہ کرتے ہیں یہ سنیچر کی شام اجلاس میں معلوم ہوجائے گا۔

ایسی اطلاعات ہیں کہ آزاد اراکین نے کل رات ملاقات کی ہے لیکن یہ اراکین کسی حتمی نتیجے پر نہیں پہنچ سکے کہ آیا پییپلز پارٹی کے امیدوار کی حمایت کی جائے یا نہیں۔ تاہم پیپلز پارٹی کے قائدین اس وقت آصف زرداری کو کامیاب کرانے کے لیے سرتوڑ کوششیں کر رہے ہیں۔