عبادالحق بی بی سی اردو ڈاٹ کام، لاہور

	’سیاسی جماعتوں کے رہنماؤں میں کچھ خواہش ہوگی تو ایسا کرنے میں کامیاب ہوجائیں گے‘

برنس مین چودھری معروف کا کہنا ہے کہ آصف زرداری اور نوازشریف نے صدر پرویز مشرف کے مواخذے کا جو فیصلہ کیا ہے یہ ایک احسن فیصلہ ہے اور عوام کی بہتری کےلیے ہی یہ اعلان کیا گیا ہے۔

ایک نجی ادارے میں کام کرنے والی عائشہ کا خیال ہے کہ عوام صدر پرویز مشرف کا مواخذہ چاہتے ہیں لیکن اس بارے میں یقین سے نہیں کہا جا سکتا کہ آصف علی زرداری اور نواز شریف نے صدرپرویزمشرف کے مواخذے کے لیے جو اعلان کیا ہے اس پر عمل درآمد ہو گا بھی یا نہیں۔

سیلز مین انتھونی پیٹر کی رائے ہے کہ صدر پرویز مشرف کو عہدے سے ہٹانے کے لیے چاہیے کتنی ہی کوشش کیوں نہ کر لی جائے کچھ نہیں ہو گا کیونکہ صدر بہت مضبوط ہیں اور وہ عہدہ نہیں چھوڑیں گے۔

علی حمزہ کا، جو ایک نجی ادارے میں کام کرتے ہیں، موقف ہے کہ لوگوں کی اکثریث یہی چاہتی ہے کہ صدر پرویز مشرف کا مواخذہ کیا جائے۔اس لیے اگر دو سیاسی جماعتوں کے رہنماؤں میں کچھ خواہش ہوگی تو ایسا کرنے میں کامیاب ہوجائیں گے۔

طالب علم سعد ملک کا کہنا ہے کہ ملکی تاریخ اس بات کی گواہ ہے کہ سیاست دانوں نے جو وعدہ کیے وہ کبھی پورے نہیں کیے۔ ان کا کہنا ہے کہ نو برس سے صدر پرویز مشرف کے خلاف کچھ نہیں ہوسکا اور صدر مشرف جو چاہتے ہیں اسی طرح کرتے ہیں۔

محمد وقاص کے بقول پہلے بھی وعدہ کیے جاتے رہیں ہیں لیکن کبھی ان وعدوں کو پورا نہیں کیا گیا۔حکومت نے چار ماہ پہلے جو وعدہ کیا تھا سب کے سامنے ہے کہ اس اعلان پر کتنا عمل درآمد کیا گیا ہے۔ آج ہر چیز کی قمیت بڑھ گئی ہے۔