رفعت اللہ اورکزئی بی بی سی اردو ڈاٹ کام، پشاور

	عینی شاہدین کے مطابق سکیورٹی اہلکاروں نے ایک معاہدے کے تحت طالبان کو اپنے ہتھیار دئے ۔

حکام کے مطابق قلعے کو دھماکہ خیز مواد سے اڑانے کی کوشش بھی کی گئی ۔

ہنگو پولیس کے ایک اہلکار نے بی بی سی کو بتایا کہ پیر کی شام درجنوں مسلح طالبان زرگیری کے قریب واقع شنہ وڑی ایف سی قلعہ میں داخل ہوئے اور وہاں تعینات سکیورٹی اہلکاروں سے اسلحہ چھین کر چند گھنٹوں تک وہاں موجود رہے۔

قلعے میں ایک درجن سے زائد سکیورٹی اہلکار تعینات تھے جو ایک معاہدے کے تحت اپنا اسلحہ طالبان کے حوالے کرکے وہاں سے چلے گئے عینی شاہدین

اہلکار کے مطابق مسلح طالبان نے قلعہ کو دھماکہ خیز مواد سے اڑانے کی کوشش کی اور قلعہ کے اندر دھماکے بھی کئے جس سے عمارت کو نقصان پہنچا ہے۔ انہوں نے کہا کہ قلعہ میں دس ایف سی اہلکار موجود تھے جن کا تعلق اورکزئی ایجنسی کے علی خیل قبیلے سے بتایا جاتا ہے۔

تاہم عینی شاہدین کا دعوی ہے کہ قلعے میں ایک درجن سے زائد سکیورٹی اہلکار تعینات تھے جو ایک معاہدے کے تحت اپنا اسلحہ طالبان کے حوالے کرکے وہاں سے چلے گئے۔

مقامی لوگوں کے مطابق طالبان نے قلعے پر قبضہ کرنے سے پہلے علاقے کے عمائدین سے بات چیت کی اور ان کی رضامندی سے عمارت میں داخل ہوئے۔ انہوں نے کہا کہ عسکریت پسندوں نے قلعے میں دھماکوں کے بعد کسی نامعلوم مقام کی طرف چلے گئے۔

ادھر دوسری طرف ہنگو کے مشران اور علماء کرام پر مشتمل ایک جرگہ مقامی طالبان سے مذاکرات کے لیے اورکزئی ایجنسی پہنچ چکا ہے۔ جرگہ کے ایک رکن نے بی بی سی کو بتایا کہ جرگہ طالبان سے مذاکرات مکمل کرنے کے بعد عسکریت پسندوں کے مطالبات حکومت کو پیش کریگا۔

واضح رہے کہ چند روز قبل ہنگو پولیس نے دوابہ کے مقام پر چھ طالبان کو گرفتار کیا تھا جبکہ بعد میں طالبان نے بھی جوابی کاورائی کے طور پر ایک پولیس تھانے کا کئی گھنٹوں تک محاصرے کئے رکھا۔

تاہم مقامی انتظامیہ نے صورتحال سے نمٹنے کےلئے فوج طلب کرلی تھی۔ اس کے علاوہ تین دن قبل زرگیری کے مقام پرایف سی اہلکاروں کے ایک قافلے پر حملے میں چودہ سکیورٹی اہلکار مارے گئے تھے۔