عزیزاللہ خان
بی بی سی اردو ڈاٹ کام، کوئٹہ |  |
| | | وزیراعلیٰ بلوچستان نے کہا ہے کہ ان کوشش ہے کہ اس طرح کے تمام جعلی مقدمات واپس لے لیے جائیں |
بلوچستان حکومت نے نواب اکبر بگٹی اور ان کے خاندان کے خلاف دائر تمام مقدمات کی تفصیل طلب کی ہے اور بقول وزیرِاعلیٰ بلوچستان کے حکومت کی کوشش ہے کہ تمام جعلی مقدمات واپس لے لیے جائیں۔ دریں اثنا ڈیرہ بگٹی اور کاہان کے علاقوں میں کشیدگی بر قرار ہے۔ ڈیرہ بگٹی سے پولیس اہلکاروں نے بتایا ہے کہ نواب اکبر بگٹی اور ان کے خاندان کے خلاف گزشتہ تین سالوں میں دائر کیے گئے مقدمات کی تفصیلات طلب کی گئی ہیں۔ وزیراعلیٰ بلوچستان نواب اسلم رئیسانی نے صحافیوں سے کہا ہے کہ ان کوشش ہے کہ اس طرح کے تمام جعلی مقدمات واپس لے لیے جائیں اور انہوں نے تفصیلات مانگی ہیں جن کا جائزہ لینے کے بعد فیصلہ کیا جائے گا۔ ڈیرہ بگٹی میں نواب اکبر بگٹی، ان کے دو پوتوں براہمداغ بگٹی اور علی خان بگٹی اور ان کے کئی ساتھیوں پر اغواء برائے تاوان اور سرکاری املاک کو نقصان پہنچانے سے متعلق دو درجن سے زیادہ مقدمات درج ہیں اور یہ مقدمات دسمبر دو ہزار پانچ کے بعد درج کیے گئے ہیں جب ڈیرہ بگٹی اور کوہلو میں مبینہ فوجی کارروائی شروع کی گئی تھی۔ کوئٹہ میں ذوالفقار علی بھٹو دور کے وفاقی وزیر اطلاعات اور انسانی حقوق کی تنظیم کے سابق چیئرمین طاہر محمد خان ایڈووکیٹ نے کہا ہے کہ ماضی میں بھی حکومتوں نے اس طرح کے مقدمات واپس لیے ہیں اور آئین میں اس کی گنجائش موجود ہے۔ انہوں نے کہا کہ البتہ وہ لوگ جو متاثر ہوئے ہیں وہ عدالت میں جا سکتے ہیں لیکن اس میں حکومت فریق نہیں ہو گی۔ نواب اکبر بگٹی کے بیٹے جمیل اکبر بگٹی نے کہا ہے کہ انہیں صوبائی حکومت کی کوششوں پر شک نہیں ہے لیکن اختیارات کسی اور کے پاس ہیں۔ انہوں نے کہا کہ وہ بحیثیت بلوچ اور نواب اکبر بگٹی کے بیٹے کی حیثیت سے صدر جنرل ریٹائرڈ پرویز مشرف کے خلاف نواب بگٹی بالاچ مری اور سینکڑوں دیگر افراد کی ہلاکت کے خلاف عدالت میں ضرور جائیں گے۔
| عدالت میں ضرور جاؤں گا  بلوچ اور نواب اکبر بگٹی کے بیٹے کی حیثیت سے صدر جنرل ریٹائرڈ پرویز مشرف کے خلاف نواب بگٹی، بالاچ مری اور سینکڑوں دیگر افراد کی ہلاکت کے خلاف عدالت میں ضرور جاؤں گا  جمیل اکبر بگٹی |
ادھر ڈیرہ بگٹی سے آمدہ اطلاعات کے مطابق سوئی کے مضافات میں سرچ آپریشن جاری ہے اور کچھ لوگوں کو حراست میں لیا گیا ہے لیکن اس کی تصدیق نہیں ہوسکی۔ اس کے علاوہ ضلعی رابطہ افسر عبدالصمد لاسی کے تبادلے کے بعد ان کے مکان اور دفتر سے فرنٹیئر کور کے اہلکاروں کو ہٹا دیا گیا ہے جبکہ سوئی کے قریب پٹ فیڈر کے علاقے میں سندھ رینجرز نے کوئی چھ چوکیاں خالی کی ہیں جہاں فرنٹیئر کور کے اہلکاروں کو تعینات کر دیا گیا ہے۔ مقامی لوگوں نے بتایا ہے کہ قلعے میں نواب اکبر بگٹی کی مبینہ قبر پر بڑی تعداد میں فوجی موجود ہیں۔ | 
بگٹی برسی: یوم سیاہ، ہڑتال کی اپیل
