رفعت اللہ اورکزئی بی بی سی اردو ڈاٹ کام، پشاور

	اس طرح کی کارروائیوں سے عسکریت پسندوں پر کوئی اثر نہیں پڑے گا: مولوی عمر

جمعرات کو تحریک طالبان پاکستان کے ترجمان مولوی عمر نے بی بی سی کو ٹیلی فون پر بتایا کہ اس طرح کی کارروائیوں سے عسکریت پسندوں پر کوئی اثر نہیں پڑے گا لیکن نئی حکومت کیطرف سے امن مذاکرات اور خیر سگالی کے جو اشارے مل رہے ہیں ان کو دھچکا ضرور لگے گا۔

انہوں نے کہا ’ طالبان چاہتے ہیں کہ اس ملک میں امن و امان کی فضا قائم ہو، کوئی جنگ وجدل نہ ہو لیکن لگتا ہے کہ سکیورٹی فورسز امن کے قیام میں مخلص نہیں ہیں۔ ‘

انہوں نے کہا کہ امام ڈھیری مرکز سوات کے عوام کی ملکیت ہے۔ اگر وہاں لوگوں نے جاکر صفائی کی اور نماز پڑھی تویہ کوئی جرم تو نہیں۔ انہوں نے کسی حکومتی مرکز یا چوکی پر حملہ تو نہیں کیا۔

ترجمان نے کہا کہ سکیورٹی فورسز کی حالیہ کارروائی سے حکومت کی امن بات چیت کے لئے جاری کوششیں متاثر ہونگی اور مزید پیچیدگیاں پیدا ہونے کے امکانات ہیں۔

مولوی عمر نے کہا کہ نئی حکومت کی طرف سے طالبان کو امن مذاکرات کی پیشکش کے بعد عسکریت پسندوں کی جانب سے بھی مثبت جواب دیا گیا ہے اور اس سلسلے میں دونوں طرف سے خیر سگالی کے پیغامات اور خطوط کا سلسلہ بھی جاری ہے۔ لیکن تاحال باضابطہ طور پر بات چیت کا سلسلہ شروع نہیں ہوسکا ہے۔

اخباری اطلاعات کے مطابق سوات میں طالبان جنگجوؤں کا ایک گروپ گزشتہ روز مولانا فضل اللہ کے مرکز امام ڈھیری گیا اور وہاں صفائی کی۔ بعد میں وہاں مقامی لوگ بھی بڑی تعداد میں جمع ہوئے تھے۔

جمعرات کی صبح سکیورٹی فورسز نے اچانک مرکز پر چھاپہ مارا اور وہاں کا کنٹرول حاصل کرنے کے بعد تین جگجوؤں کو گرفتار بھی کیا۔ مقامی لوگوں کا کہنا ہے کہ سکیورٹی فورسز نے گٹ پیچار کے علاقوں میں مشتبہ شدت پسندوں کے ٹھکانوں کو بھاری توپ خانے سے نشانہ بنایا ہے۔