تحریکِ طالبان پاکستان نامی تنظیم گزشتہ ماہ کے وسط میں قائم ہوئی تھی

تحریکِ طالبان پاکستان نامی تنظیم کے بندوبستی علاقے کے ترجمان غازی احمد نے پشاور میں صحافی رحیم اللہ یوسف زئی سے بات کرتے ہوئے کہا ہے کہ ان کی تنظیم نے حکومت کو سات دن کی مہلت دی ہے کہ وہ اس دوران سوات، جنوبی وزیرستان اور دیگر علاقوں میں جاری فوجی کارروائیاں بند کر دے۔

ان کا کہنا تھا کہ اگر ایسا نہ کیا گیا تو صوبہ سرحد کے دارالحکومت پشاور سمیت متعدد اضلاع میں جوابی کارروائیوں کا سلسلہ شروع کر دیا جائے گا۔

یہ دھمکی گزشتہ روز پاکستان کے قبائلی علاقے جنوبی وزیرستان میں جیٹ طیاروں کی بمباری کے بعد سامنے آئی ہے۔

بمباری کا یہ واقعہ جمعرات تین جنوری کو دوپہر دو بجے کے قریب محسود قبائل کے علاقے میں پیش آیا تھا اور اس میں تین مشکوک مقامات کو نشانہ بنایا گیا تھا۔جن علاقوں میں بمباری کی گئی اس میں ایمرراغزائی؛ شک توئی اور سراروغہ شامل ہیں۔

یاد رہے کہ تحریکِ طالبان پاکستان نامی تنظیم گزشتہ ماہ کے وسط میں پاکستان کے قبائلی علاقوں اور صوبہ سرحد میں مبینہ طور پر سرگرم طالبان کے مختلف گروپوں نے متحد ہو کر قائم کی تھی اور اس کی قیادت جنوبی وزیرستان میں طالبان کے سربراہ بیت اللہ محسود کو مقرر کیا گیا تھا۔