ہارون رشید بی بی سی اردو ڈاٹ کام، اسلام آباد

	وزیراعظم یوسف رضا گیلانی نے ایف سی آر قانون کے خاتمے کا اعلان کیا ہے

اس بات کا اعلان شمالی وزیرستان میں مقامی طالبان کے رہنما حافظ گل بہادر نے کسی نامعلوم مقام سے ٹیلیفون پر بی بی سی اردو ڈاٹ کام سے بات کرتے ہوئے کیا اور کہا کہ انہیں صرف نظام شریعت ہی ان کے لئے قابل قبول ہوگا۔

انہوں نے یہ بھی اعلان دہرایا کہ ان کا حال ہی میں قائم کی جانے والی ’تحریک طالبان پاکستان‘ سے بھی کوئی تعلق نہیں ہے۔ ایک سوال کے جواب میں کہ آیا وہ اس تحریک سے علیحدگی اختیار کر رہے ہیں تو ان کا کہنا تھا کہ وہ آغاز سے ہی اس کا حصہ نہیں تھے۔

اس بیان سے ایک روز قبل تحریک طالبان پاکستان کے ترجمان مولوی عمر نے وزیراعظم کی جانب سے مبینہ شدت پسندوں کے ساتھ مذاکرات کے بارے میں بیان کا خیرمقدم کرتے ہوئے کہا تھا کہ اگر نئی حکومت نے صدر پرویز مشرف کی پالیسیوں کو نہیں دہرایا تو اس کے ساتھ ہرقسم کا تعاون کرنے کو تیار ہیں۔

مبصرین اسے تحریک طالبان پاکستان کی تعاون کی مشروط پیشکش قرار دے رہے تھے لیکن مولوی عمر نے ایف سی آر کے خاتمے پر اپنا کوئی ردعمل ظاہر نہیں کیا تھا۔

گزشتہ برس دسمبر میں قبائلی علاقوں اور صوبہ سرحد میں مبینہ طور پر سرگرم طالبان کے مختلف گروپوں نے متحد ہو کر بیت اللہ محسود کی قیادت میں تحریک طالبان پاکستان کی بنیاد ڈالی تھی۔لیکن شمالی وزیرستان کے طالبان اس سے دور رہے۔

اس وقت اطلاعات تھیں کہ جنوبی وزیرستان میں احمدزئی وزیر قبائل کے علاقے میں سرگرم طالبان رہنما ملا نذیر اور شمالی وزیرستان کے حافظ گل بہادر کے درمیان غیرملکیوں کو پناہ دینے کے مسئلے پر اختلافات پیدا ہوئے ہیں۔ تاہم ان کی طالبان نے تردید کی تھی۔

شمالی وزیرستان کے شدت پسندوں کے آج کے بیان سے واضح ہوا ہے کہ قبائلی علاقوں میں طالبان پوری طرح سے ایک پلیٹ فارم پر جمع نہیں ہوسکے ہیں۔ تاہم یہ واضح نہیں ہوسکا کہ علیحدگی سے متعلق وضاحت کے لئے اب کیوں مناسب وقت سمجھاگیا۔