عبدالحئی کاکڑ بی بی سی اردو ڈاٹ کام، پشاور

	’ابھی تک نئی حکومت اور طالبان کے درمیان کوئی رابطہ نہیں ہوا‘

تحریک طالبان کے ترجمان مولوی عمر نے بی بی سی اردو کو فون پر بتایا کہ وہ نومنتتخب وزیراعظم یوسف رضا گیلانی کی جانب سے مذاکرات کے ذریعے مسائل کے حل کے بارے میں بیان کا اس لیے خیر مقدم کر تے ہیں کیونکہ خود طالبان بھی یہ سمجھتے ہیں کہ پاکستان بالخصوص قبائلی علاقوں میں امن و امان کا حل بات چیت ہی میں مضمر ہے۔

انہوں نے مزید کہا کہ طالبان پاکستان کے بغیر تنخواہ کے سپاہی ہیں اور وہ نہیں چاہتے کہ یہاں پر دوسروں کی ایماء پر کارروائیاں جاری رہیں۔ان کے مطابق وزیراعظم کے بیان سے ان کی حوصلہ افزائی ہوئی ہے اور وہ نومنتخب حکومت کی جانب سے صدر مشرف کی تشکیل شدہ خارجہ پالیسی کو تبدیل کرنے کی شکل میں ایک اور جرات مندانہ قدم اٹھائے جانے کی امید بھی کرتے ہیں۔

مولوی عمر کا کہنا ہے کہ اٹھارہ فروری کے انتخابات کے بعد جس طرح پاکستان کی سیاست میں تبدیلی آئی ہے اسی طرح انہوں نے جنگ زدہ علاقوں میں بھی طالبان کے خلاف حکومتی پالیسیوں میں ایک قسم کی تبدیلی محسوس کی ہے۔

انہوں نے کہا کہ ابھی تک نئی حکومت اور طالبان کے درمیان کسی قسم کا کوئی رابطہ نہیں ہوا ہے اور صرف اخباری بیانات کے ذریعے ہی دونوں ایک دوسرے کے لیے خیر سگالی کے جذبات کا اظہار کر رہے ہیں۔

واضح رہے کہ پاکستان کے نومنتخب وزیراعظم یوسف رضا گیلانی نے سنیچر کو اعتماد کا ووٹ حاصل کرنے کے بعد اپنے خطاب میں کہا کہ مبینہ شدت پسندوں کو بھی جمہوری عمل کے اس سفر میں ان کا ساتھ دینا چاہیئے اور ہتھیار پھینکنے والوں کے ساتھ بات چیت کی جائے گی۔