اعجاز مہر
بی بی سی اردو ڈاٹ کام، اسلام آباد |  |
| | | یوسف رضا گیلانی پچیس مارچ کو اپنے عہدے کا حلف اٹھائیں گے |
ایوان صدر میں وزیر اعظم یوسف رضا گیلانی کو ان کے عہدے کا حلف دینے کی تیاریاں شروع ہوگئی ہیں۔ صدر پرویز مشرف گیارہ بجے وزیر اعظم سے ان کے عہدے کا حلف لیں گے۔صدر پرویز مشرف کا آٹھ سالہ دور میں پانچویں وزیر اعظم سے حلف ہوگا۔ اطلاعات کے مطابق آصف علی زرداری، بلاول بھٹو زرداری، میاں نواز شریف اور شہباز شریف ایوان صدر سے دعوت موصول ہونے کے باوجود، وزیر اعظم کی حلف برداری کی تقریب میں شریک نہیں ہوں گے۔ پاکستان مسلم لیگ (ن) کا موقف ہے کہ ان کی جماعت کے وفاقی وزیر صدر جنرل پرویز مشرف سے مجبوراً حلف لیں گے لیکن وہ جنرل مشرف کو قانونی صدر نہیں مانتے اور انہیں عہدے سے الگ ہو جانا چاہیے۔ توقع کی جا رہی ہے کہ وزیر اعظم بدھ کو قومی اسمبلی سے اعتماد کا ووٹ لیں گے۔پیپلز پارٹی کے اعلیٰ ذرائع کا کہنا ہے کہ سید یوسف رضا گیلانی منگل کو اکیلے حلف اٹھائیں گے۔ ذرائع کے مطابق یوسف رضا گیلانی حلف لینے کے بعد اپنی کابینہ تشکیل دیں گے اور اعتماد کا ووٹ لینے کے بعد ان کی کابینہ حلف اٹھائے گی۔ حکمراں اتحادی جماعتوں کے پارلیمانی پارٹیوں کے اجلاس کے دوران بھی تمام ارکان اسمبلی کو ہدایت کی گئی ہے کہ وہ پیر کو اجلاس ملتوی ہونے کے بعد بھی دارالحکومت میں ہی موجود رہیں تاکہ بدھ کو نو منتخب وزیراعظم کے اعتماد کا ووٹ لینے کے وقت ان کی ایوان میں موجودگی یقینی ہو۔ پیر کے روز پاکستان کی نو منتخب قومی اسمبلی نے یوسف رضا گیلانی کو نیا قائدِ ایوان منتخب کر لیا ہے۔انہیں 264 ووٹ ملے جبکہ ان کے مدِمقابل امیدوار چودہری پرویز الہٰی 42 ووٹ حاصل کر سکے۔ یوسف رضا گیلانی نے اپنے پہلے مختصر خطاب میں گرفتار ججوں کی فوری رہائی کا ’حکم‘ دیا ہے لیکن کہا ہے کہ جج اپنے مسائل احتجاج کی بجائے پارلیمان کے اندر حل کرائیں۔ انہوں نے یہ بھی کہا ہے کہ ان کی حکومت بینظیر بھٹو کے قتل کی تحقیقات اقوامِ متحدہ سے کروانے اور ذوالفقار علی بھٹو کے عدالتی قتل پر معافی کے لیے پارلیمان میں قرارداد پیش کرے گی۔ پیر کو ہونے والے اجلاس میں پیپلز پارٹی کے نامزد امیدوار برائے قائدِ ایوان یوسف رضا گیلانی جبکہ مسلم لیگ قاف کی طرف سے چودھری پرویز الہیٰ وزارتِ عظمیٰ کے امیدوار تھے۔ وزیراعظم کے انتخاب کے لیے خفیہ رائے شماری کا طریقہ اختیار نہیں کیا گیا اور
سپیکر ڈاکٹر فہمیدہ مرزا نے پانچ منٹ کے لیے ایوان میں گھنٹیاں بجانے کے لیے کہا تا کہ وہ اراکین جو لابی میں یا ایوان سے باہر ہیں اندر آ جائیں۔ اس کے بعد یوسف رضا گیلانی کے حامیوں کو لابی اے جبکہ پرویز الٰی کے حامیوں کو لابی بی میں جانے کو کہا گیا۔ | 
’ عہدے کی مدت، پارٹی کی صوابدید‘
