شہزاد ملک بی بی سی اردو ڈاٹ کام، اسلام آباد

	ڈاکٹر فہمیدہ مرزا ملک کی پہلی خاتون سپیکر منتخب ہوئیں

اس سے پہلے ایک خاتون بیگم اشرف عباسی دو مرتبہ قومی اسمبلی کی ڈپٹی سپیکر منتخب ہوچکی ہیں۔

قومی اسمبلی کی سپیکرز کی تاریخ میں ڈاکٹر فہمیدہ مرزا سے پہلے قائداعظم محمد علی جناح، مولوی تمیزالدین، عبدالوہاب خان، فضل القادر، عبدالجبار خان، ذوالفقار علی بھٹو، فصل الہی چوہدری، صاحبزادہ فاروق علی، ملک معراج خالد ، سید فخر امام، حامد ناصر چھٹہ، گوہر ایوب خان، سید یوسف رضا گیلانی، الہی بخش سومرو اور چوہدری امیر حسین قومی اسمبلی کے سپیکر کے عہدے پر فائز رہ چکے ہیں۔

بیگم اشرف عباسی پہلی مرتبہ سنہ انیس سو بہتر میں اُس وقت قومی اسبلی کی ڈپٹی سپیکر منتخب ہوئی تھیں جب پیپلز پارٹی کے بانی ذوالفقار علی بھٹو قومی اسمبلی کے پریزیڈنٹ بنے۔ اس کے بعد وہ دوسری مرتبہ انیس سو اٹھاسی میں پیپلز پارٹی کی چیئر پرسن بےنظیر بھٹو کے وزارت اعظمی کے دور میں ڈپٹی سپیکر منتخب ہوئیں۔

صاحبزادہ فاروق علی قومی اسمبلی کے پہلے سپیکر تھے جنہوں نے انیس سو تہتر کے آئین کے تحت حلف لیا تھا۔

پاکستان کی قومی اسمبلی کی سپیکر کی تاریخ میں مولوی تمیز الدین خان سب سے زیادہ عرصے تک قومی اسمبلی کے سپیکر رہے۔ وہ قومی اسمبلی کے پریزیڈنٹ چودہ دسمبر انیس سو اڑتالیس میں منتخب ہوئے اور انیس سو چون تک اس عہدے پر فائز رہے۔ اس طرح ان کے عہدے کی معیاد پانچ سال دس ماہ اور دس دن بنتی ہے جبکہ وہ دوسری مرتبہ انیس سو باسٹھ سے انیس اگست انیس سو ترسیٹھ تک قومی اسمبلی کے سپیکر رہے اس طرح ان کے عہدے کی معیاد ایک سال دو ماہ اور سات دن بنتی ہے۔

	چوہدری امیر حسین

فضل الہی چوہدری سب سے کم عرصے کے لیے قومی اسمبلی کے سپیکر رہے ہیں اور ان کے عہدے کی معیاد ایک سال سے بھی کم ہے۔ وہ پندرہ اگست انیس سوبہتر کو قومی اسمبلی کے سپیکربنے تھےاور سات اگست انییس سو تہتر میں ان کو عہدے سہ ہٹایا گیا تھا۔

مولوی تمیزالدین اور ملک معراج خالد دو ایسے افراد ہیں جو دو دو مرتبہ قومی اسبملی کے سپیکر رہے ہیں۔

قائد اعظم محمد علی جناح ملک کی اسمبلی کے پہلے پریزیڈنٹ منتخب ہوئے تھے اس عہدے پر وہ گیارہ اگست انیس سو سنتالیس سے لیکر گیارہ ستمبر انیس سو اڑتالیس یعنی اپنی وفات تک فائز رہے۔