سربجیت کے گھر والوں کا کہنا ہے کہ وہ بیگناہ ہے

بھارتی شہری منجیت سنگھ یا سربجیت سنگھ کو 1991 میں جاسوسی اور مختلف بم دھماکوں کے جرم میں موت کی سزا سنائی گئی تھی۔ ان بم دھماکوں میں تقریباً 14 افراد ہلاک ہوئے تھے۔

لاہور کی کوٹ لکھپت جیل کے ایک سینیئر آفیسر کے مطابق سربجیت سنگھ کو پہلی اپریل کو پھانسی دی جائے گی۔

سربجیت کا کہنا ہے کہ وہ غلط شناخت کی سزا بھگت رہے ہیں۔ ان کا کہنا ہے کہ وہ 1990 میں نشے کی حالت میں غلطی سے سرحد پار کر کے پاکستان میں داخل ہو گئے تھے اور پاکستانی انہیں منجیت سنگھ سمجھ رہے ہیں جن پر بم دھماکوں کا شبہ تھا۔

	سربجیت سنگھ کی رہائی کے لیے اپیل کرتی بچیاں

پاکستانی اہلکاروں کا موقف ہے کہ انہیں اس وقت پکڑا گیا جب وہ بم دھماکوں کے بعد سرحد پار کر کے بھارت جانے کی کوشش کر رہے تھے۔

اس معاملے پر جب پاکستان کے انسانی حقوق کے امور سے متعلق نگراں وزیرانصار برنی ایڈوکیٹ سے رابطہ قائم کیا گیا تو انہوں نے سربجیت سنگھ کے وارنٹ برائے سزائے موت جاری کیے جانے سے نہ صرف لاعلمی ظاہر کی بلکہ یہ بھی کہا کہ عموماً اتوار کے دن اس طرح کے وارنٹ جاری نہیں کیے جاتے اور وہ اس بارے میں صبح اپنی وزارت کے ذریعے ایوان صدر سے معلومات حاصل کر کے ہی کوئی حتمی بات کہہ سکتے ہیں۔

انصار برنی کا یہ بھی کہنا تھا کہ سربجیت سنگھ اب تک اٹھارہ برس کی قید کاٹ چکا ہے اور یہ مدت عمر قید کی سزا سے بھی زیادہ ہے اور یوں سربجیت کی قید اب انسانی حقوق کا ایک معاملہ بھی قرار دیا جاسکتا ہے۔ انصار برنی کے مطابق وہ اسی نقطۂ نظر کے تحت پیرکے دن سربجیت کے لیے رحم کی اپیل صدر پاکستان کو بھجوائیں گے۔

اس ماہ کے آغاز میں صدر مشرف نے ایک اور بھارتی شہری کشمیر سنگھ کی سزا معاف کروا کر انہیں رہا کر دیا تھا۔ کشمیر سنگھ جاسوسی کے الزام میں 35 سال پاکستان کی مختلف جیلوں میں قید رہے۔