عدنان عادل بی بی سی اردو ڈاٹ کام، لاہور

	سربجیت کو چار مقدمات میں سزائے موت سنائی جاچکی ہے

بی بی سی سے بات کرتے ہوئے سربجیت کے وکیل رانا عبدالحمید نے کہا کہ گزشتہ سال اکتوبرمیں لاہور ہائی کورٹ کے حکم کے بعد انہیں اپنے مؤکل سے ملنے کی صرف ایک بار اجازت دی گئی اور اس وقت سے اب تک پنجاب کے سیکرٹری داخلہ انہیں اپنے مؤکل سے ملنے کی اجازت نہیں دے رہے۔ سربجیت لاہور کی کوٹ لکھپت جیل میں قید ہیں۔

انہوں نے کہا کہ ان کی ملنے کی درخواست پر محکمہ داخلہ کہتا ہے کہ وہ ایک ہائی سیکیورٹی قیدی ہیں اور وہ اس درخواست پر غور کررہے ہیں۔

سربجیت سنگھ عرف منجیت سنگھ کو انیس سو نوے میں لاہور، فیصل آباد اورقصور میں چار بم دھماکے کرنے اور بھارت کے لیے جاسوسی کرنے کے الزام میں چار مقدمات میں لاہور ہائی کورٹ سے سزائے موت سنائی جاچکی ہے۔ ان چار دھماکوں میں کُل چودہ افراد ہلاک ہوئے تھے۔

سربجیت سنگھ کے وکیل رانا عبدالحمید نے کہا کہ ایک مقدمہ میں سربجیت سنگھ کی اپیل سپریم کورٹ نے فنی بنا پر اس وجہ سے مسترد کردی تھی کہ وہ تقریبا پونے دو سال کی تاخیر سے دائر کی گئی تھی۔ انہوں نے کہا کہ اس مقدمہ میں نظر ثانی کی اپیل بھی مسترد کی جاچکی ہے۔

	سربجیت کے وکیل پریس کانفرنس کے دوران

ان کا کہنا تھا کہ موت کی کوٹھری میں قیدی کو عدالت میں اپیل کرنے کے لیے سہولت فراہم کرنا جیل حکام کا فرض تھا جو انہوں نے ادا نہیں کیا۔

وکیل نے یہ بھی کہا کہ سربجیت سنگھ اور ان کے اہل خانہ نے صدر مملکت پرویز مشرف سے ان کی موت کی سزا معاف کرنے کے لیے رحم کی اپیل کی ہوئی ہے اور وہ صدر مملکت سے اس پر ہمدردانہ غور کی درخواست کرتے ہیں۔

پاکستان کے آئین کے مطابق ملک کا صدر کسی بھی مجرم کی رحم کی اپیل پر اس کی سزا کو تبدیل کرنے کا اختیار رکھتا ہے۔

بھارتی حکام کا کہنا ہے کہ منجیت سنگھ درحقیقت امرتسر کے رہنے والے سربجیت سنگھ ہیں اور پاکستانی حکومت کو ان کی شناخت کے بارے میں غلط فہمی ہوئی ہے۔