ریاض سہیل بی بی سی اردو ڈاٹ کام، کراچی

	حقوق نسواں کی تنظیموں کا کہنا ہے کہ معاشرے کی سوچ میں تبدیلی لانے کی ضرورت ہے

ان جماعتوں کا کہنا ہے کہ پاکستان پیپلز پارٹی اور مسلم لیگ (ن) کو خواتین کی بہتری، فلاح اور تحفظ کے لیے مثبت قانون سازی کرنی چاہیے۔

صدر پرویز مشرف کے جو چند مثبت اقدامات تسلیم کیے جاتے ہیں، ان میں خواتین کو تینتیس فیصد نمائندگی کا حق دینا بھی شامل ہے ۔ ساٹھ مخصوص نشستوں پر یہ خواتین اسمبلی میں تو پہنچ گئیں مگر وہ ایسی کوئی قانون سازی کرانے میں کامیاب نہ ہوسکیں جس سے ان کی موجودگی کا احساس ہو اور عام عورت کو کوئی ریلیف مل سکے ۔

عورت فاؤنڈیشن کی ریجنل ڈائریکٹر انیس ہارون کا کہنا ہے کہ حکومت کا ایسا کوئی ارادہ ہی نہیں تھا کہ خواتین کی فلاح کے لیے اقدامات کیے جائیں۔ ’اگر حکومت کا ارادہ ہو تو بہت تبدیلی آسکتی ہے، جو بات ہم کرتے ہیں وہ اتنے لوگوں تک نہیں پہنچ سکتی اس کے برعکس حکومت یا ریاست کی طرف سے جو بات کی جاتی ہے اس کی پہنچ ملک کے کونے کونے تک ہوتی ہے۔ ان کے جو سیاسی ارادے ہوں گے وہ اس کے تحت ہی اقدام کریں گے اس لیے کہ وہ بہت سی چیزیں کرسکتے ہیں جن کے ہم صرف مطالبات کرسکتے ہیں‘۔

انسانی حقوق کی سالانہ رپورٹس کے مطابق صدر مشرف کے دور اقتدار میں نجی عدالتوں یعنی جرگوں میں اضافہ ہوا جن میں سے کچھ کی سرپرستی تو اعلیٰ حکومتی حکام بھی کرتے رہے۔

	2008 کے انتخابات میں قومی اسمبلی کی پندرہ عام نشستوں پر خواتین امیدواروں نے کامیابی حاصل کی ہے

پاکستان میں حالیہ برسوں میں خواتین پر تشدد کے رجحان میں بھی اضافہ دیکھنے میں آیا ہے تاہم ملک میں ایسا کوئی قانون نہیں جو انہیں تحفظ فراہم کرسکے۔ مختاراں مائی سے لیکر نسیمہ لبانو تک جنسی تشدد کا شکار خواتین آج بھی مکمل انصاف کی متلاشی ہیں۔ اس صورتحال کے باوجود مختاراں مائی پر امید ہیں وہ کہتی ہیں کہ’ابھی تک سپریم کورٹ میں مقدمہ بند پڑا ہے، انسان چھ سات سال انتظار کرے تب ہی انصاف ملتا ہے مگر اس کی بھی کوئی یقین دہانی نہیں ہے۔ اس لیے ایک انسان صرف امید ہی کرسکتا ہے‘۔

حقوق نسواں کی تنظیموں کا کہنا ہے کہ معاشرے کی سوچ میں تبدیلی لانے کی ضرورت ہے۔ وویمن ایکشن فورم کی رہنما عظمیٰ نورانی کہتی ہیں:’ لوگوں کی سوچ میں اسی وقت تبدیلی آسکتی ہے جب حکومت لبرل سوچ رکھے گی اور یہ سمجھے گی کہ مذہب، رسم و رواج کے نام پر جاری سلوک بند ہونا چاہیے۔ کارو کاری، وٹہ سٹہ، سوراہا جیسی نام نہاد رسومات کے خلاف قانون سازی کی ضرورت ہے‘۔

پاکستان پیپلز پارٹی نے گزشتہ حکومت میں اپوزیشن میں ہونے کے باوجود حدود آرڈیننس میں ترمیم کے لیے حکمران اتحاد کا ساتھ دیا۔ پیپلزپارٹی کی نو منتخب رکن اسمبلی شازیہ مری کا کہنا ہے کہ خواتین پر تشدد اور انہیں ہراساں کیے جانے کے خلاف اور پناہ گاہوں کے حوالے سے بل پیش کیے جائیں گے۔ پیپلز پارٹی کو امید ہے کہ دیگر جماعتیں بھی ان کا ساتھ دیں گی۔

	حقوق نسواں کی تنظیموں کے مطابق مذہب، رسم و رواج کے نام پر جاری سلوک بند ہونا چاہیے

پیپلز پارٹی، مسلم لیگ (ن) اور عوامی نیشنل پارٹی کی کامیابی کو پاکستان میں اعتدال پسندوں کی کامیابی قرار دیا جارہا ہے۔ عورت فاؤنڈیشن کی انیس ہارون کا کہنا ہے کہ ایوان میں اب خواتین کی فلاح کے حوالے سے کوئی سپیڈ بریکر نہیں رہا ہے۔ ’یہ جماعتیں جو خود کو روشن خیال کہتی ہیں ان میں سے کچھ نے ہمارے ساتھ حدود آرڈیننس کی منسوخی کے وعدے کیے تھے۔ اگر انہیں کچھ وقت بھی دیا جائے تو پہلے سال میں کچھ نہیں ہوتا مگر کم سے کم ایسی علامات اور اشارے تو دیے جاسکتے ہیں کہ وہ ایسا کرنا چاہ رہے ہیں‘۔

2008 کے انتخابات میں قومی اسمبلی کی پندرہ عام نشستوں پر خواتین امیدواروں نے کامیابی حاصل کی ہے جس کے بعد قومی اسمبلی کے تین سو بیالیس اراکین کے ایوان میں خواتین کی تعداد پچہتر ہو گئی ہے تاہم ان کے متحد ہونے میں سیاسی وابستگیاں رکاوٹ ہیں۔