دلاور خان وزیر بی بی سی اردو ڈاٹ کام، ڈیرہ اسماعیل خان

	پاکستان فوج کی طرف سے ابھی تک حملے کے بارے میں کچھ نہیں کہا گیا

یہ میزائل پاکستان سکیورٹی فورسز کے ایک حملے میں ہلاک ہونے والے طالبان کے حمایتی قبائلی رہنما نیک محمد کے آبائی گاؤں کالوشہ میں ایک مکان پر گرا جو اطلاعات کے مطابق مقامی طالبان کا ایک ٹھکانہ تھا۔

مقامی لوگوں کا کہنا ہے کہ بدھ اور جمعرات کی درمیانی شب رات دو بجے کے قریب جنوبی وزیرستان کے صدر مقام وانا سے کوئی دس کلومیٹر مغرب کی جانب افغان سرحد کے قریب اعظم ورسک کے علاقے کالوشہ میں ایک میزائل گرا جس میں آٹھ کے قریب طالبان ہوگئے۔

	میزائل حملہ 2004 میں ہلاک ہونے والے کمانڈر نیک محمد کے آبائی گاؤں میں ہوا

علاقے کے لوگوں کا کہنا ہے کہ جس مکان پر میزائل گرا اس مکان میں کچھ عرصہ سے غیرملکی رہ رہے تھے جو بظاہر عرب معلوم ہوتے تھے۔ ابھی تک یہ معلوم نہیں ہوسکا کہ ہلاک ہونے والوں میں کوئی اہم رہنما شامل ہے یا نہیں۔

وانا کے ایک مقامی رہائشی عبداللہ نے بی بی سی کو بتایا کہ میزائل گرنے سے ایک زوردار دھماکہ ہوا جس کے بعد علاقے کے لوگ اپنے گھروں سے نکل گئے لیکن یہ معلوم نہ ہوسکا کہ دھماکہ کہاں ہوا تھا۔

یاد رہے کہ جنوبی وزیرستان اور شمالی وزیرستان میں پہلے بھی کئی مرتبہ میزائل گرے ہیں۔اس وقت بھی یہ تصدیق نہیں ہوسکی کہ میزائل کہاں سے آئے تھے۔ مقامی لوگ یہ الزام لگا رہے ہیں کہ میزائل افغانستان سے داغے جاتے ہیں