دلاور خان وزیر بی بی سی اردو ڈاٹ کام،ڈیرہ اسماعیل خان

	مارٹر گولہ وانا کے قریب سکاؤٹس قلعہ تنائی سے فائر ہوا(فائل فوٹو)

ہلاک ہونے والوں میں دو کا تعلق ڈیرہ اسماعیل خان اور ایک تعلق جنوبی وزیرستان سے بتایا جاتا ہے۔

جنوبی وزیرستان کے پولیٹکل انتظامیہ نے کہا ہے کہ منگل کے شام وانا سے قریباً ساٹھ کلومیٹر مشرق کی جانب علاقہ محسود کے گاؤں مولے خان سرائے میں ایک آرا مشین پر مارٹرگولہ گرا ہے جس سے تین افراد ہلاک جبکہ دو زخمی ہوگئے۔ہلاک ہونے والوں میں حنیف اور رمضان نامی اشخاص کا تعلق ڈیرہ اسماعیل خان اور نیاز محمد کا تعلق جنوبی وزیرستان سے ہے۔

حکام کے مطابق مارٹر گولہ وانا کے قریب سکاؤٹس قلعہ تنائی سے فائر ہوا۔ مقامی لوگوں کے مطابق سکاؤٹس قلعہ تنائی، منزئی اور ایف ار جنڈولہ سے علاقہ محسود میں مختلف ٹھکانوں پر توپخانے کا استعمال کیا جاتا رہا ہے۔

یاد رہے کہ پاکستان پیپلز پارٹی کی چیئر پرسن بے نظیر بھٹو کے قتل بعد جنوبی وزیرستان میں حالات انتہائی کشیدہ ہیں اور حکام نے علاقائی اجتماعی ذمہ داری کے تحت محسود قبائل کی پکڑ دھکڑ شروع کی ہے اور ضلع ٹانک اور ڈیرہ اسماعیل خان میں درجنوں محسود قبائلیوں کوگرفتار کر لیا گیا ہے۔