رفعت اللہ اورکزئی بی بی سی اردو ڈاٹ کام، پشاور

	سوات میں مقامی طالبان اور فوج کے درمیان کئی مرتبہ جھڑپیں ہوئی ہیں

پولیس ذرائع کے مطابق یہ واقعہ بدھ کی شام چار باغ کے علاقے میں پیش آیا۔

عینی شاہدین کے مطابق جمعیت علماء اسلام (ف) کے سابق رکن صوبائی اسمبلی اور اٹھارہ فروری کو ہونے والے انتخابات میں سوات کے دو حلقوں سے آزاد حیثیت میں الیکشن میں حصہ لینے والے امیدوار مفتی حسین احمد اپنی گاڑی میں انتخابی مہم سے واپس آ رہے تھے کہ چار باغ کے علاقے میں سڑک کے کنارے نصب بم پھٹنے سے گاڑی میں سوار دو افراد ہلاک جبکہ تین دیگر زخمی ہوگئے۔

	سوات میں فوج کی موجودگی کے باوجود انتخابی امیدواروں پر حملے ہوئے ہیں

یاد رہے کہ مفتی حسین احمد دو ہزار دو کے انتخابات میں سوات سے ایم ایم اے کے ٹکٹ پر صوبائی اسمبلی کے امیدوار منتخب ہوئے تھے۔ لیکن اٹھارہ فروری کے انتخابات میں وہ سوات کے دو حلقوں این اے تیس اور پی ایف چھیاسی سے آزاد حیثیت سے حصہ لے رہے ہیں۔

واضح رہے کہ تقریباً ایک ماہ قبل سوات میں چار باغ ہی کے علاقے میں پاکستان مسلم لیگ (ق) کے صوبائی اسمبلی کے امیدوار اور سابق صوبائی وزیر اسفندیار امیرزیب ایک انتخابی ریلی پر بم حملے میں آٹھ افراد ہلاک ہوگئے تھے جس میں اسفندیار امیرزیب خود بھی شامل تھے۔