ارمان صابر بی بی سی اردو ڈاٹ کام، کراچی

	بے نظير بھٹو کی ہلاکت کے بعد انکے فرزند بلاول بھٹو زرداری کو پارٹی کا چئرمین منتخب کیا گیا

اتوار کو پارٹی کے شریک چئرمین آصف علی زرداری کی زیرِصدارت کراچی میں واقع بلاول ہاؤس میں ہوا جس میں پیپلز پارٹی کی صوبائی قیادت کے علاوہ مرکزی قائدین نے بھی شرکت کی۔

پیپلزپارٹی سندھ کی سیکرٹری اطلاعات ڈاکٹر فہمیدہ مرزا نے بی بی سی کو بتایا کہ اجلاس میں اٹھارہ فروری کو ہونے والے انتخابات میں ممکنہ دھاندلی کے حوالے سے مختلف حلقوں سے شکایات ملنے پر غور کیا گیا ہے جبکہ بینظیر بھٹو کے قتل کو آج ایک ماہ گزرنے کے بعد اس میں تحقیقات کے حوالے سے بھی بات ہوئی ہے۔

ڈاکٹر فہمیدہ نے کہا کہ پیپلزپارٹی وفاق کی علامت ہے لہذٰا یہ فیصلہ کیا گیا ہے کہ پارٹی آنیوالے عام انتخابات میں بھرپور حصہ لے گی۔ ان کا کہنا تھا کہ پپلزپارٹی نے اپنے ورکروں کو ہدایات دی ہیں کہ وہ ووٹ ڈالنے کے بعد اپنے اپنے پولنگ سٹیشنوں کے باہر موجود رہیں اور پولنگ سٹیشنوں کا گھیراؤ کریں، تاہم انہوں نے یہ نہیں بتایا کہ یہ گھیراؤ کس مقصد کے تحت کیا جائے گا۔

پیپلزپارٹی نے حکومت سے بارہا مطالبہ کیا تھا کہ بینظیر بھٹو قتل کیس کی تحقیقات ایک بین الاقوامی تحقیقاتی کمیشن سے کرائی جائے لیکن حکومت کی جانب سے ایسا نہ کیے جانے پر آصف علی زرداری ایسا ہی کمیشن قائم کرنے کے لیے اقوامِ متحدہ سے براہ راست درخواست کر چکے ہیں۔

ڈاکٹر فہمیدہ مرزا نے بتایا کہ پیپلزپارٹی کی صوبائی کونسل کے اجلاس میں اس بات کا اعادہ کیا گیا ہے کہ بینظیر بھٹو کے مشن کو جاری رکھا جائے گا اور نئی قیادت کے ہاتھ مضبوط کیے جائیں گے۔ انہوں نے کہا کہ بھٹو ایک شخصیت کا نام نہیں بلکہ یہ ایک نظریہ ہے اور اس کو پیپلزپارٹی نے آگے لے کر چلنا ہے۔