احمد رضا بی بی سی اردو ڈاٹ کام، کراچی

	پاکستان میں مہنگائی عروج پر ہے

کراچی میں پرنٹنگ اور پبلشنگ کے کاروبار سے وابستہ طارق فضلی نے بتایا کہ لوکل مارکیٹ میں کاغذ اور گتے کی قیمت میں پچھلے چند ہفتوں میں کم سے کم تین روپے فی کلو اضافہ ہوا ہے جس کا اثر ان کی مصنوعات پر بھی پڑے گا۔

’جو کاغذ انچاس روپے کلو تھا وہ اب باون روپے کلو ہے اور اس کا اثر مصنوعات پر منتقل ہوجائے گا۔ مثلاً جو کاپی دس روپے کی ملتی تھی وہ اب گیارہ روپے کی ہوجائے گی۔‘

انہوں نے کہا کہ کاغذ کی قیمتیں بڑھنے سے عام آدمی متاثر ہوگا۔ ’ایک تو اس کا اثر تمام تعلیمی مٹیریل کاپی، کتابوں وغیرہ پر پڑے گا اور دوسرا کوئی بھی پروڈکٹ جو ہم خریدتے ہیں اس میں پیکجنگ (ڈبے) کی قیمت بھی شامل ہوتی ہے، تو جب پیکجنگ کا مٹیریل مہنگا ہوگا تو لامحالہ اس پروڈکٹ کی قیمت پر بھی فرق پڑے گا۔‘

کاغذ اور گتا درآمد کرنے والے محمد انیس کے مطابق پچھلے چھ مہینوں کے دوران ملک میں کاغذ اور گتے کے نرخوں میں لگ بھگ تیس فیصد کا اضافہ ہوا ہے۔ ان کا کہنا ہے کہ بین الاقوامی مارکیٹ میں پلپ یعنی درخت کا گودا جس سے کاغذ اور گتا تیار ہوتا ہے اس کے ساتھ ساتھ تیل کی قیمتیں بڑھی ہیں جس کا اثر کاغذ اور گتے کی قیمتوں پر پڑا ہے۔

’جو مال ہمیں 740 ڈالر میں مل رہا تھا وہ اب ہمیں 940 ڈالر میں مل رہا ہے اور یہ اضافہ پچھلے چار سے چھ ماہ میں ہوا ہے۔‘

انہوں نے بتایا کہ کاغذ کی قیمت زیادہ ہونے کی ایک وجہ اس کی درآمد پر عائد بھاری امپورٹ ڈیوٹی اور ٹیکسز ہیں۔ ’سال 2007-2008 کے بجٹ کے مطابق کاغذ کی درآمد پر ہمیں 25 فیصد ڈیوٹی، 15 فیصد سیلز ٹیکس، دو فیصد ایڈوولرم ٹیکس اور پانچ فیصد انکم ٹیکس دینا پڑتا ہے، اس کے علاوہ کسٹم اور بینکوں کے اخراجات بھی ہوتے ہیں تو سب ملاکر مجموعی طور پر اس مد میں باون فیصد دینا پڑتا ہے۔‘

محمد انیس کے مطابق پاکستان میں زیادہ تر پرنٹنگ اور پیکنگ مٹیریل کے لئے غیرملکی کاغذ اور گتا استعمال ہوتا ہے لیکن اس کے نتیجے میں الیکشن مٹیریل کی طباعت مہنگی نہیں ہوگی کیونکہ اس میں مقامی کاغذ استعمال ہوتا ہے جو غیرمعیاری ہونے کی وجہ سے سستا ہوتا ہے۔