 | | | برسلز میں پرویز مشرف کے خلاف تحریکِ انصاف کا ایک احجاج |
یورپ کے دورے پر آئے ہوئے پاکستانی صدر پرویز مشرف کو برسلز میں تحریکِ انصاف کے کارکنوں کی جانب سے احتجاج کا سامنا رہا ہے۔ اتوار کے روز برسلز میں تحریکِ انصاف کے کارکنوں نے ایک مظاہرے کا انعقاد کیا جہاں وہ پرویز مشرف کے خلاف نعرے لگارہے تھے اور ان کے خلاف بینر اٹھا رکھے ہوئے تھے۔ صدرِ پاکستان یورپ کے آٹھ روزہ دورے پر ہیں۔ دورے کے پہلے دن اتوار کو وہ بیلجیئم کے شہر برسلز پہنچے ہیں۔ برسلز میں ان کی بات چیت مغربی ملکوں کے فوجی اتحاد نیٹو اور یورپی یونین کے رہنماؤں سے ہونے والی ہے۔ خیال کیا جاتا ہے کہ یورپی رہنماؤں سے ملاقاتوں کےدوران صدر پرویز مشرف پاکستان میں جمہوری اصلاحات اور دہشت گردی کے خلاف اقدامات کے بارے میں بات کرینگے۔ اسلام آباد میں ہمارے نامہ نگار ہارون رشید کے مطابق صدر مشرف یورپی رہنماؤں سے ملاقات میں عالمی امور پر پاکستان کے نکتۂ نظر کواجاگر کرنے کے علاوہ خطے اور پاکستان کے حالیہ واقعات کے تناظر میں پائی جانے والی غلط فہمیوں کو دور کرنے کی کوشش کا ارادہ رکھتے ہیں۔ اتوار کو چار یورپی ممالک کے نو روزہ دورے پر روانہ ہونے سے قبل صحافیوں سے بات کرتے ہوئے صدر مشرف نے کہا کہ بیرون ملک پاکستان کے تشخص کو بہتر بنانا ان کی سب سے بڑی کوشش ہوگی۔ چکلالہ ایئربیس سے روانگی کے موقع پر صدر کو نگران وزیراعظم محمد میاں سومرو، سپیکر قومی اسمبلی چوہدری امیر حسین، اطلاعات و نشریات کے وزیر سینیٹر نثار اے میمن، بری فوج کے سربراہ جنرل اشفاق پرویز کیانی اور دیگر اعلٰی حکام نے الوداع کیا۔ سپیکر چوہدری امیر حسین قائم مقام صدر کے طور پر اس دوران ذمہ داریاں ادا کریں گے۔ صدر مشرف بیلجیم، فرانس، سوئٹزرلینڈ اور برطانیہ جائیں گے۔ وہ سوئٹزرلینڈ کے شہر ڈیووس میں سالانہ عالمی اقتصادی فورم میں شرکت کرنے والے ہیں۔ صدر پرویز مشرف نے کہا ہے کہ اس اہم عالمی اقتصادی فورم سےخطاب کرنے کی انہیں انفرادی دعوت دی گئی ہے۔ | 
مشرف یورپ کے دورے پر
