ہارون رشید
بی بی سی اردو ڈاٹ کام ، اسلام آباد |  |
| | | بیرون میں ملک پاکستان کے تشخص کو بہتر بنانا سب سے بڑی کوشش ہوگی:مشرف |
صدر پرویز مشرف نے کہا ہے کہ وہ یورپی رہنماؤں سے ملاقات میں عالمی امور پر پاکستان کے نکتہ نظر کواجاگر کرنے کے علاوہ خطے اور پاکستان کے حالیہ واقعات کے تناظر میں پائی جانے والی غلط فہمیوں کو دور کریں گے۔ اتوار کو چار یورپی ممالک کے نو روزہ دورہ پر روانہ ہونے سے قبل صحافیوں سے کہا کہ بیرون ملک پاکستان کے تشخص کو بہتر بنانا ان کی سب سے بڑی کوشش ہوگی۔ چکلالہ ایئربیس سے روانگی کے موقع پر صدر کو نگران وزیراعظم محمد میاں سومرو، سپیکر قومی اسمبلی چوہدری امیر حسین، اطلاعات و نشریات کے وزیر سینیٹر نثار اے میمن، بری فوج کے سربراہ جنرل اشفاق پرویز کیانی اور دیگر اعلٰی حکام نے الوداع کیا۔ سپیکر چوہدری امیر حسین قائم مقام صدر کے طور پر اس دوران ذمہ داریاں ادا کریں گے۔ صدر پرویز مشرف دورہ کے دوران بیلجیم، فرانس، سوئٹزرلینڈ اور برطانیہ جائیں گے۔ دورہ کے پہلے مرحلے میں وہ بیلجیم کے دارالحکومت برسلز پہنچیں گے۔ صدر پرویز مشرف نے کہا کہ اس دورے کے دوران وہ عالمی موضوعات پر بھی پاکستان کے نکتہ نظر کو اجاگر کرنا چاہتے ہے۔ پاکستان کے بیرون ملک تشخص کے حوالے سے ایک سوال کے جواب میں صدر پرویز مشرف نے کہا کہ وہ اپنے دورہ کے دوران اس پہلو کو خاص اہمیت دیں گے، بالخصوص یورپ میں پاکستان کے تشخص کی بہتری پر توجہ مرکوز کریں گے تاکہ پاکستان کے بارے میں درست حقائق پیش کرتے ہوئے غلط فہمیوں کا خاتمہ ہو سکے۔ ڈیووس میں سالانہ عالمی اقتصادی فورم میں شرکت کے حوالے سے سوال پر انہوں نے کہا کہ اہم عالمی شخصیات سے ملاقاتیں ہوں گی جن میں دوطرفہ دلچسپی کے امور پر تبادلہ خیال ہوگا۔ صدر پرویز مشرف نے کہا کہ اس اہم عالمی اقتصادی فورم سےخطاب کرنے کی انہیں انفرادی دعوت دی گئی ہے۔ | 
باجوڑ: قبائل اور حکومت میں معاہدہ
