بندش کے بعد جیو کی ٹیم نے کئی پروگرام کھلے آسمان تلے کیے تھے

جیو اور کئی دوسرے چینلز کو ایمرجنسی لگائے جانے سے چند گھنٹے پہلے تین نومبر کو رات گئے بند کر دیا گیا تھا۔ اسی دن حکومت نے نیا پیمرا ترمیمی آرڈیننس جاری کیا تھا اور چار نومبر کو الیکٹرانک میڈیا کے لیے نیا ضابطہ اخلاق جاری کر دیا گیا۔

بارہ نومبر کو کئی دوسرے چینلز کو تو بحال کر دیا گیا لیکن جیو اور اے آر وائی کی کیبل پر پاکستان میں نشریات بند رہیں۔ تاہم دونوں چینلز نے دبئی کے میڈیا سٹی (ڈی ایم سی) سے اپنی بین الاقوامی نشریات جاری رکھیں۔ اس کے بعد 16 دسمبر کو جیو کو دبئی سے بھی بند کر دیا گیا۔ اگرچہ وہاں اس کی کچھ اندرونی وجوہات بتائی گئیں لیکن بظاہر ایسا لگتا تھا کہ یہ بھی پاکستان حکومت کے کہنے پر کیا گیا ہے۔ بعد میں اے آر وائی کو بھی پاکستان میں کیبل پر اجازت دے دی گئی لیکن جیو بہرحال بند رہا۔ اب صدر کے حکم کے بعد اس کو بحال کر دیا جائے گا۔

پاکستان میں جیو کی نشریات کی بحالی کے اقدام کو سیاسی اور سماجی حلقوں میں سراہا گیا ہے۔