ذوالفقار علی بی بی سی اردد ڈاٹ کام، اسلام آباد

	جنرل مشرف نے ملک میں آئین معلطل کرنے کے ساتھ ہی نجی میڈیا چینل پر پابندی عائد کر دی تھی

پاکستان الیکٹرانک میڈیا ریگولیڑی اتھارٹی کے ترجمان محمد سلیم نے بتایا ہے کہ دو مقامی نیوز ٹی چینلز’ آج‘ اور’ ڈان نیوز‘ کے علاوہ بی بی سی اور سی این این کی نشریات پر پابندی ختم کی گئی ہے۔

انہوں نے کہا کہ ان مقامی چینلز کی طرف سے اس یقین دہانی کے بعد پابندی اٹھائی گئی کہ وہ ضابطہ اخلاق کی پاسداری کریں گے تاہم دو اور اہم مقامی نجی ٹی وی چینلز جیو اور آے آر وائی کی نشریات پر پابندی برقرار ہے۔

پاکستان کے صدر جنرل پرویز مشرف کی طرف سے تین نومبر کو ملک میں ہنگامی حالت کے نفاذ کے بعد پاکستان میں ذرائع ابلاغ کے قوانیں میں ترمیم کر کے کڑی پابندیاں عائد کی گئیں۔

ترمیم شدہ پیمرا آرڈیننس کےمطابق کوئی چینل ایسے پروگرام کو نشر کرنے کا مجاز نہیں ہوگا جس میں صدر، فوج، عدلیہ یا رکن اسمبلی کی تضحیک کا پہلو نکلتا ہو۔

پیمرا ترمیمی آرڈیننس کے مطابق کوئی بھی ٹی وی میزبان یا مہمان کوئی ایسی رائے نہیں دے گا جو نظریہ پاکستان یا ملکی سلامتی کے خلاف ہو۔

صحافیوں نے ان پابندیوں کے خلاف پاکستان بھر میں احتجاج شروع کیا اور ان کا یہ مطالبہ رہا ہے کہ میڈیا پر پابندیاں ختم کی جائیں اور ٹی وی چینلز کی نشریات بحال کی جائیں۔

صحافیوں نےحکومت کےضابطہ اخلاق کوصحافت کا گلا گھونٹنے کے مترادف قرار دیا ہے۔

لیکن اس معاملے پر بعض ٹی وی چینلز کےمالکان اور ان میں کام کرنے والے صحافیوں کے درمیان اختلافات پائے جاتے ہیں۔

صحافیوں کو جہاں حکومت کا تیار کردہ ضابط اخلاق قبول نہیں وہیں وہ مطالبہ کرتے ہیں کہ ذرائع ابلاغ سے متعلق ترمیمی قانون کو واپس لے۔ پاکستان فیڈرل یونین آف جرنلسٹ نے اس کو کال قانون قرار دیا ہے۔

صحافیوں کا کہنا ہے کہ وہ میڈیا پر پابندیوں کے خلاف احتجاج جاری رکھیں گے۔