شہزاد ملک بی بی سی اردو ڈاٹ کام، اسلام آباد

	چیف الیکشن کمشنر کی منظوری کے بغیر کسی بھی افسر کا تبادلہ نہیں کیا جا سکتا

چیف الیکشن کمشنر نے سندھ پولیس کے انسپکٹر جنرل سے بیس نومبر سنہ دو ہزار سات سے لیکر اب تک صوبے میں ہونے والے پولیس افسران کے تبادلوں کی تفصیلی طلب کر لی ہے۔

سیکرٹری الیکشن کمیشن کنور دلشاد کے مطابق صوبہ سندھ کی پولیس کے اعلٰی حکام ایک دو یوم میں اس سلسلے میں ایک رپورٹ الیکشن کمیشن کو پیش کردیں گے۔

انہوں نے کہا کہ الیکشن کمیشن کو سیاسی جماعتوں کی طرف سے بہت سی شکایات موصول ہورہی تھیں کہ الیکشن کمیشن کی طرف سے تبادلوں پر پابندی کے باوجود صوبے میں ڈی ایس پی اور ایس ایچ او کی سطح پر تبادلے ہو رہے ہیں جس پر چیف الیکشن کمشنر نے یہ احکامات جاری کیے ہیں۔

الیکشن کمیشن کو سیاسی جماعتوں کی طرف سے بہت سی شکایات موصول ہورہی تھیں کہ الیکشن کمیشن کی طرف سے تبادلوں پر پابندی کے باوجود صوبے میں ڈی ایس پی اور ایس ایچ او کی سطح پر تبادلے ہو رہے ہیں جس پر چیف الیکشن کمشنر نے یہ احکامات جاری کیے ہیں سیکرٹری الیکشن کمیشن کنور دلشاد

واضح رہے کہ رولز کے مطابق انتخابات کے شیڈول کے اعلان کے بعد چیف الیکشن کمشنر کی منظوری کے بغیر کسی بھی افسر کا تبادلہ نہیں کیا جا سکتا۔

ادھر سیکرٹری الیکشن کمیشن کنور دلشاد نے کہا ہے کہ عام انتحابات میں چالیس دنوں کی تاخیر کے باوجود پولنگ اسٹیشنوں کی فہرستوں میں کوئی تبدیلی نہیں کی گئی۔

سنیچر کے روز سرکاری خبر رساں ایجنسی سے گفتگو کرتے ہوئے انہوں نے کہا کہ انتخابی عمل کے سلسلے میں چاروں صوبائی الیکشن کمشنروں نے چوبیسں دسمبر کو حتمی فہرست تیار کی تھی اور اسی پر عملدرآمد کیا جائے گا۔ الیکشن کمیشن نے یہ فیصلہ کیا تھا کہ ملک بھر میں چونسٹھ ہزار ایک سو چھتہر پولنگ اسٹیشنز اور ایک لاکھ سترہ ہزار ایک سو چوہتر پولنگ بوتھ قائم کیے جائیں گے۔

اٹھارہ فروری کو ملک میں ہونے والے انتخابات کے سلسلے میں چونسٹھ ہزار ایک سو چھہتر پریذائیڈنگ افسر، تین لاکھ سینتس ہزار چھ سو چار اسسٹینٹ پریذائیڈنگ افسر اور ایک لاکھ سترہ ہزار ایک سو چوہتر مرد اور خواتین پولنگ افسران اپنے فرائض انجام دیں گے۔