عزیزاللہ خان بی بی سیی اردو ڈاٹ کام، کوئٹہ

	دونوں بم حملے وقفے وقفے سے فوج کی چوکیوں پر کیے گئے ہیں

دھماکوں کی آوازیں اس قدر زور دار تھیں کہ دور دور تک سنی گئی ہیں۔ یہ حملے دو علیحدہ علیحدہ چوکیوں پر چند منٹوں کے وقفے سے کیے گئے۔ اس واقعہ کے بعد علاقے کو گھیرے میں لیکر سیل کر دیا گیا ہے اور ہر قسم کی گاڑیوں کا داخلہ بند کر دیا گیاہے۔

کوئٹہ کے پولیس افسر محمد اکبر نے بتایا ہے کہ ابتدائی تحقیقات سے ایسا لگتا ہے کہ یہ خود کش حملے تھے۔ انہوں نے کہا کہ ایک حملہ آور نے اپنے آپ کو ایک چوکی پر اڑا دیا ہے اور پھر کچھ وقفے سے دوسرے حملہ آور نے سو گز کے فاصلے پر واقع ایک دوسری چوکی پر اپنے آپ کو اڑایا دیا۔

انہوں نے کہا کہ دو خود کش حملہ آوروں کے علاوہ آٹھ افراد ہلاک اور اٹھارہ افراد زخمی ہوئے ہیں جن میں فوجی شامل ہیں۔ انہوں نے کہا کہ تین زخمیوں کی حالت تشویشناک ہے تاہم انہوں نے زخمی اور ہلاک ہونے والے فوجیوں کی تعداد نہیں بتائی۔

تاہم فوج کے تعلقات عامہ کے سربراہ میجر جنرل وحید ارشد کے مطابق دونوں دھماکوں میں تین فوجیوں سمیت آٹھ افراد ہلاک ہوئے ہیں۔ ایسی اطلاعات بھی ہیں کہ ان دونوں دھماکوں میں گیارہ افراد ہلاک ہوئے ہیں لیکن سرکاری سطح پر اس کی تصدیق نہیں ہوسکی۔

کوئٹہ چھاونی میں عام طور پر شہریوں کو مشکل سے جانے کی اجازت دی جاتی ہے اور گاڑیوں کے مالکان کو کنٹونمنٹ بورڈ سے اجازت نامہ لینا پڑتا ہے۔ کچھ موڑ کے راستے پر ہنہ کے علاقے کی طرف جانے والی پبلک ٹرانسپورٹ کی بسیں چلتی ہیں۔

اس سال فروری کے مہینے میں کوئٹہ کی کچہری میں سینیئر سول جج کی عدالت میں مبینہ خود کش حملے میں سینیئر سول جج اور سات وکیلوں سمیت سولہ افراد ہلاک اور پینتیس زخمی ہو گئے تھے۔ اس کے علاوہ دو ہزار تین میں امام بارگاہ اثنا عشریہ اور دو ہزار چار میں عاشورہ کے جلوس پر خود کش حملے کیے گئے تھے جن میں لگ بھگ ایک سو افراد ہلاک ہو گئے تھے۔

فوجیوں اور سیکیورٹی فورسز پر حملوں کی اطلاعات یہاں بلوچستان کے مختلف علاقوں سے موصول ہوتی رہتی ہیں۔