عزیزاللہ خان بی بی سی اردو ڈاٹ کام، کوئٹہ

	دو روز پہلے گوادر تربت میں ائر پورٹ پر راکٹ داغے گئے

پنجگور کے ضلعی پولیس افسر عبدالحئی عامر نے بتایا ہے کہ بدھ کی پنجگور شہر سے کوئی پانچ کلومیٹر دور تسک کے قریب ناملعوم افراد نے ایف سی کے ایک قافلے پر حملہ کیا ہے۔

انہوں نے کہا کہ حملہ آوروں نے مسجد کے عقب میں گھات لگا رکھی تھی اور سپیڈ بریکر کے پاس جب ایف سی کا ٹینکر اور گاڑی آہستہ ہوئے تو ان پر دستی بم پھینکے اور فائرنگ شروع کر دی۔

پولیس کے مطابق اس حملے میں تین اہلکار ہلاک اور ایک زخمی ہوا ہے جبکہ مقامی سطح پر لوگوں نے ہلاک اور زخمی ہونے والے افراد کی تعداد چھ سے آٹھ تک بتائی ہے۔

دریں اثنا خود کو کالعدم مسلح تنظیم بلوچ لبریشن فرنٹ کا ترجمان ظاہر کرنے والے دودا بلوچ نے حملے کی ذمہ داری اپنی تنظیم کی جانب سے قبول کی ہے اور کہا ہے کہ اس حملے میں آٹھ اہلکار ہلاک ہوئے ہیں لیکن سرکاری سطح پر اس کی تصدیق نہیں ہو سکی۔

اے این ایف کی فائرنگ
پنجگور میں ہی ایک دوسرے واقعہ میں انسداد منشیات کی فورس کے اہلکاروں نے فائرنگ کرکے دو افراد کو ہلاک اور ایک کو زخمی کر دیا ہے۔ پنجگور سے سابق قائد حزب اختلاف کچکول علی ایڈووکیٹ اور دیگر مقامی افراد نے بتایا ہے کہ اے این ایف کے اہلکاروں نے پکنک کے لیے جانے والے تین افراد پر خواہ مخواہ فائرنگ کر کے دو افراد کو ہلاک اور ایک کو زخمی کر دیا۔

اس حوالے سے پولیس افسر عبدالحئی عامر نے بی بی سی کو بتایا کہ اے این ایف کے حکام کے مطابق ان تین شہریوں نے ان کے اہلکاروں پر حملہ کرنے کی کوشش کی تھی۔انہوں نے کہا کہ ایک زخمی کو فرنٹیئر کور کے خصوصی طیارہ میں کوئٹہ کے ملٹری ہسپتال منتقل کر دیا گیا ہے۔