ہارون رشید بی بی سی اردو ڈاٹ کام، اسلام آباد

	پیپلز پارٹی نے قومی سطح پر کمیٹیاں تشکیل دینے کا اعلان کیا ہے جو مقید سیاسی کارکنوں کو اور ان کو جنہیں رہائی کے بعد مقدمات کا سامنا ہے قانونی مدد فراہم کریں گی۔

اسلام آباد میں پی پی پی کے سیکرٹری جنرل جہانگیر بدر کی جانب سے جاری ایک بیان میں ان کا کہنا تھا کہ مسلم لیگ (ن) کا اعلان ان کی جماعت کے فیصلے کی توثیق ہے۔

انہوں نے خوشی کا اظہار کیا کہ میثاق جمہوریت پر دستخط کرنے والے نواز شریف نے بےنظیر بھٹو کے سیاسی لائحہ عمل کو اپنایا ہے۔انہوں نے امید ظاہر کی کہ حزب اختلاف کی تمام جماعتیں آئندہ بھی میثاق جمہوریت پر عمل درآمد کے سلسلے میں تعاون جاری رکھیں گی۔

جہانگیر بدر نے اپنی جماعت کے موقف کو دوہرایا کہ وہ انتخابی میدان ’کنگز پارٹی‘ کے لیے کھلا نہیں چھوڑیں گے۔ مسلم لیگ (ن) نے اتوار کے روز حزب اختلاف کے اتحاد اے پی ڈی ایم کے ایک اجلاس کے بعد انتخابات میں حصہ لینے کا اعلان کیا تھا۔

پیپلز پارٹی نے قومی سطح پر کمیٹیاں تشکیل دینے کا اعلان کیا ہے جو مقید سیاسی کارکنوں کو اور ان کو جنہیں رہائی کے بعد مقدمات کا سامنا ہے قانونی مدد فراہم کریں گی۔ اسلام آباد میں اس کمیٹی کے رابطہ کار کے طور پر الیاس محسن کو تعینات کیا گیا ہے۔