عبادالحق بی بی سی اردو ڈاٹ کام، لاہور

	’پی سی او کے تحت حلف اٹھانے والے ججوں کے سامنے پیش نہیں ہونگے‘

مسلم لیگ (ن) کے سربراہ شہباز شریف نے انتخابات میں ٹکٹوں کی تقسیم کے لیے پارلیمانی بورڈ کے اجلاس کے بعد پریس کانفرنس میں واضح کیا کہ وہ ان ججوں کے سامنے پیش نہیں ہونگے جنہوں نے پی سی او کے تحت حلف اٹھایا ہے۔

نواز شریف اور شہباز شریف نے کاغذات نامزدگی مسترد کیے جانے پر چیف الیکشن کمشنر جسٹس ریٹائرڈ قاضی فاروق کو نظرثانی کی درخواست دی تھی۔ جس میں کہا گیا کہ ان کے کاغذات نامزدگی بلاجواز مسترد کیے گئے ہیں، حالانکہ سنہ دو ہزار دو میں ان کے کاغذات منظور کیے گئے تھے۔

عدلیہ کی بحالی پر اختلاف  اے پی ڈی ایم اور اے آر ڈی کی مذاکراتی ٹیموں کے درمیان عدلیہ کی بحالی کے معاملے پر اتفاق رائے نہیں ہوسکا۔ ہم انتخابات سے پہلے عدلیہ کی بحالی چاہتے ہیں جبکہ پیپلز پارٹی اسے آئندہ پارلیمان پر چھوڑنا چاہتی ہے چوہدری نثار علی خان

شہباز شریف نے کہا کہ مسلم لیگ اور اس کے قائد نواز شریف کا اصولی فیصلہ ہے کہ کسی بھی صورت پی سی او کے تحت حلف اٹھانے والے ججوں کے سامنے پیش نہیں ہونگے۔

ایک سوال پر مسلم لیگ (ن) کے سربراہ کا کہنا تھا کہ چیف الیکشن کمشنر نے پی سی او کے تحت حلف نہیں اٹھایا تھا اس لیے ان کوخط لکھا گیا ہے۔

پریس کانفرنس میں موجود مسلم لیگ (ن) کے رہنماء چودھری نثار علی خان نے اخبار نویسوں کو بتایا کہ اے پی ڈی ایم کا اجلاس نو دسمبر کو لاہور میں طلب کر لیا گیا ہے جس میں انتخابات کے بائیکاٹ اور انتخابات میں حصہ لینے یا نہ لینے کے بارے میں فیصلہ کیا جائے گا۔

	یورپی یونین کے ممالک سے تعلق رکھنے والے سفارتکار جمعہ کو نواز شریف سے ملے

ان کا کہنا تھا کہ اے پی ڈی ایم اور اے آر ڈی کی مذاکراتی ٹیموں کے درمیان عدلیہ کی بحالی کے معاملے پر اتفاق رائے نہیں ہوسکا۔ ان کے مطابق وہ انتخابات سے پہلے عدلیہ کی بحالی چاہتے ہیں جبکہ پیپلز پارٹی اسے آئندہ پارلیمان پر چھوڑنا چاہتی ہے۔

چودھری نثار علی خان کا کہنا تھا کہ وہ چاہتے ہیں کہ مطالبات تسلیم نہ ہونے پر آٹھ جنوری کے انتخابات کا بائیکاٹ کیا جائے جبکہ پیپلز پارٹی بائیکاٹ کی بجائے نو جنوری کو احتجاجی تحریک چلانے کی تجویز پیش کر رہی ہے۔