رفعت اللہ اورکزئی بی بی سی اردو ڈاٹ کام، سوات

نقل مکانی کرنے والے لوگ تیزی سے اپنے گھروں کولوٹ رہے ہیں

دوسری طرف لڑائی کی وجہ سے مختلف علاقوں سے نقل مکانی کرنے والے لوگ تیزی سے اپنے گھروں کو واپس آ رہے ہیں جبکہ بعض لوگوں نے عسکریت پسندوں کے چلے جانے پر خوشی کا اظہار بھی کیا ہے۔

مینگورہ میں صحافیوں کو بریفنگ دیتے ہوئے مقامی فوجی ترجمان میجر امجد اقبال نے بتایا کہ سکیورٹی فورسز نے یونین کونسل کانجو سے لیکر مٹہ تک تمام علاقے کو کنٹرول کرنے کے بعد وہاں چوکیاں قائم کردی ہے جہاں پر میں فرنٹیر کور، فرنٹیر کانسٹیبلری اور پولیس اہلکاروں کو تعینات کیا گیا ہے۔

ان کے مطابق بریم پل اور پیر کلی پر سکیورٹی فورسز نے تو پہلے ہی قبضہ کر رکھا تھا تاہم اب وہ وہاں اپنے مورچوں کو مزید مستحکم کر رہی ہیں۔ میجر امجد اقبال نے دعوی کیا کہ شانگلہ اور سوات میں اب تک سکیورٹی فورسز کی کارروائیوں میں دو سو تیس عسکریت پسند مارے جاچکے ہیں جن میں ان کے بقول کچھ غیر ملکی بھی شامل تھے۔

تاہم انہوں نے غیر ملکیوں کے حوالے سے ذرائع ابلاغ کے نمائندوں کو کوئی ثبوت فراہم نہیں کیے۔

مولانا فضل اللہ ایجنٹ  سوات کے مختلف علاقوں میں ہیلی کاپٹروں سے دو قسم کے پمفلٹ پھینکے گئے ہیں جس میں مولانا فضل اللہ کو مبینہ طور ہندوستان، اسرائیل اور افغانستان کا ایجنٹ قرار دیا گیا ہے

ترجمان نے واضح کیا کہ سوات میں آپریشن اس وقت تک جاری رہے گا جب تک علاقے میں مکمل امن قائم نہیں ہوجاتا۔

ادھر علاقے میں رات کے وقت سکیورٹی فورسز کی طرف سے عسکریت پسندوں کے ٹھکانوں پر فائرنگ کا سلسلہ جاری ہے جبکہ دن کے وقت گن شپ ہیلی کاپٹر بھی گشت کرتے دکھائی دیتے ہیں۔

پیر کی صبح سوات کے مختلف علاقوں میں ہیلی کاپٹروں سے دو قسم کے پمفلٹ پھینکے گئے ہیں جس میں مولانا فضل اللہ کو مبینہ طور ہندوستان، اسرائیل اور افغانستان کا ایجنٹ قرار دیا گیا ہے۔

اردو زبان میں کمپیوٹر کے ذریعے لکھے گئے ایک پمفلٹ میں مولانا فضل اللہ کے بارے میں کہا گیا ہے کہ ’ وہ بہادر اور غیور کشمیری مجاہدین کو اپنے مضموم ارادوں کی تکمیل کےلیے استعمال کر رہا ہے۔‘

دوسرے پمفلٹ میں کہا گیا ہے کہ پاکستانی فوج چاہتی ہے کہ سوات میں ماضی جیسی رونق، خوشحالی اور امن ہو اورعوام کو تکلیف پہنچائے بغیر علاقے سے دہشت گردوں کا خاتمہ کیا جائے۔